Т.Гантөмөр: Шар хайс хууль зөрчөөгүй, нийтийн сонсгол ч хийхгүй

Нийслэлийн Засаг дарга асан С.Батболд, Улаанбаатар хотын захирагчийн ажлын албаны дарга Т.Гантөмөр нар БНХАУ-аас 772,238,026.00 төгрөгөөр 4820 м шар хайсыг өндөр үнээр худалдан авсан асуудал ил болж, багагүй дуулиан дэгдээсэн.

Монголын Зохион бүтээгчдийн нэгдсэн холбооноос төсвийн хөрөнгийг үр ашиггүй зарцуулсан, дотоодын үйлдвэрүүдийн хийж чадах байсан хайс хашлагыг зах зээлийн үнээс хоёр дахин өндөр үнээр БНХАУ-аас худалдан авсан асуудлаараа нийтийн сонсгол хийж, албан ёсны тайлбараа хий гэдэг шаардлагыг Улаанбаатар хотын ЗАА-ны дарга Т.Гантөмөрт хүргүүлжээ.

Гэтэл Т.Гантөмөр “Шар хайс худалдан авах ажлыг бид хууль ёсны дагуу зохион байгуулсан. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль нь нийтийн сонсголын тухай хуульд хамаарахгүй. Хууль тогтоомжийг зөрчиж, төсвийн хөрөнгөөр импортын бараа, бүтээгдэхүүн өндөр үнээр худалдан авсан, ил тод байдлыг хангаагүй, хууль бус үйлдэл хийсэн гэж үзэх үндэслэлгүй” гэх хариуг өгсөн байна.