Олон хүнийг хордуулсан “Даян хаан” зоогийн газрын үйл ажиллагааг зогсоожээ

Өмнөговь аймгийн Эрүүл мэндийн газрын 66 ажилтан байгууллагынхаа 80 жилийн ойн хүлээн авалтад оролцох үедээ хоолны хордлогод орсон ноцтой хэрэг гарсан талаар бид өмнө мэдээлсэн.

Өмнөговь аймгийн Мэргэжлийн хяналтын газраас хүлээн авалт болсон “Даян хаан” зоогийн газарт хяналт шалгалт хийж, хүлээн авалтад хэрэглэсэн хүнсний түүхий эд материал, хоолны дээж, унд ахуйн ус, орчны арчдас, мөн хүнсний түүхий эд бүтээгдэхүүнийг худалдаалж байсан дэлгүүрүүдээс хүнсний бүтээгдэхүүний дээж зэрэг нийт 28 нэр төрлийн сорьцийг авч лабораторид шинжлүүлсэн байна. Шинжилгээгээр тухайн хүлээн авалтад бэлтгэсэн зууш, 2-р хоол, мөн үлдэгдэл тахианы мах, өндөг, хиам, гахайн утсан мах зэрэг бүтээгдэхүүнээс гэдэсний бүлгийн эмгэг төрөгч нян /Salmonella/, мөн өвчтөнүүдээс авсан шинжилгээгээр тухайн хоолны хордлого үүсгэгч нян илэрч, Салмонела нянгаар үүсгэгдсэн хоолны хордлогын дэгдэлт болох нь тогтоогдсон байна.

Иймд Зөрчлийн тухай хуулийн дагуу Даланзадгад хотын “Даян хаан” нэртэй зоогийн газрын үйл ажиллагааг зогсоож, хэрэг үүсгэн шалгаж байна хэмээн МХЕГ-аас мэдээллээ.