Борис Жонсон намынхаа гишүүдийн эсэргүүцэлтэй нүүр тулав
Их Британи улс Европын Холбооноос өрх тусгаарлахын тулд багагүй саад бэрхшээлтэй нүүр тулсаар байна. Энэ зун Тереза Мэйн халааг авсан Консерватив намын Ерөнхий сайд Борис Жонсоны Брекситийг бүтэлгүйтүүлэхгүйн тулд санаачилсан хуулийг Парламентын гишүүд эсэргүүцлээ.
Жонсоны хамгийн их найдлага тавьж байсан намынх нь гишүүд түүнийг эсэргүүцэж буй сөрөг хүчнийхэнтэй санал нэгдсэн байна. Төлөөлөгчдийн танхимд явуулсан санал хураалтаар 328 гишүүн Ерөнхий сайдын саналыг эсэргүүцэж, 301 гишүүн дэмжжээ. Эсэргүүцсэн гишүүдийн 20 гаруй нь Консерватив намынхан байгаа юм.
Борис Жонсон төлөөлөгчдийн танхимд дэмжлэг авч чадаагүй тул дундын сонгууль явуулж магадгүй нөхцөл байдал үүсч байна. Ирэх 10 дугаар сард дахин сонгууль болбол Их Британи улс таван жилийн хугацаанд гурав дахиа Парламентын сонгууль явуулах юм.
Хэрэв Ерөнхий сайд 10 дугаар сарын дундуур дахин сонгууль явуулж чадахгүй бол тун хүнд байдалд орно гэж олон улсын ажиглагчид таамаглаж байна. Британи Европын Холбооноос гарч Брекситийг амжилттай батлах эцсийн хугацаа 10 дугаар сарын 31. Дундын сонгууль зарлаж чадахгүй бол Жонсон Европын Холбоотой дахин хэлэлцээр хийх амаргүй даваа угтах аж.
Эх сурвалж: www.bbc.com, www.cnn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.