Ирак: Шашны баярын үеэр 30 гаруй мөргөлч олны хөлд дарагдаж амиа алджээ
Иракын Карбала хот дахь шийт исламын шашны сүмд Ашура буюу исламын цаг тооны эхний сарын 10 дахь хоногийг тэмдэглэжээ. Шашны баяр мөргөлийн үеэр сүсэгтэн олон хэт олноороо цугласнаас болж 31 хүн амиа алдсан байна.
Тус улсын эрүүл мэндийн яамны төлөөлөгчийн мэдээлснээр 100 орчим хүн мөргөлчин олны хөлд дарагдаж гэмтэж бэртсэн ба амиа алдсан иргэдийн тоо цаашид нэмэгдэж болзошгүй гэдгийг холбогдох албаныхан анхааруулжээ.
Жил бүрийн исламын он тооллын эхний сарын 10 дахь хоногт мөргөлчин олон Карбала хотод ирдэг байна. Энэ нь МЭ 680 дугаар онд Мухаммад зөнчийн ач хүү Имам Хуссейн Карбала хотод амь өргөсөн өдөр юм.
Мөргөлчид энэ өдөр Тувайриж тосгоноос Карбала руу олон мянгаараа гүйдэг уламжлалтай. ВВС телевизэд өгсөн хотын цагдаагийн газрын мэдээллээр олон мянган мөргөлч уламжлал ёсоор гүйж байхад нэг хүн бүдэрч унаснаар ар араасаа давхралдан хүн овоо үүсчээ.
2004, 2005 онуудад Ашура ариун өдрийг тэмдэглэх үеэр мянга гаруй мөргөлч хэт олуулаа цугласнаас болж амиа алдаж байжээ.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.