ХХААХҮ-ийн сайд асан Б.Батзориг хэргээ ердийн журмаар шийдүүлэх хүсэлт гаргажээ

Эрх мэдэл, албан тушаалаа ашиглан ЖДҮХС-гаас их хэмжээний зээл авсан хэрэгт ХХААХҮ-ийн сайд асан, УИХ-ын гишүүн Б.Батзориг тэргүүтэй долоон хүнийг яллагдагчаар татсан. Тэд гэмт хэрэг үйлдсэн гэдгээ хүлээн зөвшөөрч, эрүүгийн хэргийн хялбаршуулсан журмаар хянан шийдвэрлүүлэх хүсэлт гаргасныг шүүх хүлээн зөвшөөрч, хэргийг Нийслэлийн прокурорын газарт буцаасан ч прокуророос дээрх хэрэгт эсэргүүцэл бичсэн юм. Тэгвэл ХХААХҮ-ийн сайд асан, УИХ-ын гишүүн Б.Батзориг хэргээ хялбаршуулсан журмаар хянан шийдвэрлүүлэх хүсэлтээсээ буцаж, ердийн журмаар шийдвэрлүүлэх хүсэлт гаргасан байна. Энэ нь түүний нөхдөө хөлдөө чирэхгүй гэсэн шийдвэр бололтой. Ингэснээр үлдсэн зургаан хүн нь хэргээ хялбаршуулсан журмаар хянан шийдвэрлүүлэх боломжтой болжээ.

Ийн урт хугацааны хөнгөлттэй зээл олгохдоо албан тушаалын байдлаа урвуулан ашиглаж, бусдад давуу байдал олгосон ХХААХҮЯ-ны Жижиг дунд үйлдвэрийг хөгжүүлэх сангийн захирал асан С.Төгсбилэг, Яамны Төрийн нарийн бичгийн дарга байсан Д.Энхбат, сангийн мэргэжилтэн Б.Мөнхтулга зэрэг албан тушаалтнуудад холбогдох хэрэгт яллах дүгнэлт үйлдэж, Баянзүрх дүүргийн Эрүүгийн хэргийн анхан шатны шүүхэд шилжүүлж, хялбаршуулсан журмаар шийдсэн байна. Энэ нь их хэмжээний мөнгөн дүнтэй хэргийг хялбаршуулсан журмаар шийдсэн анхны тохиолдол аж.

Э.Эрдэнэцэцэг