Ачааны автомашин айлын байшинг мөргөж, нураасан ноцтой осол гарчээ

Чингэлтэй дүүргийн 16 дугаар хороо Согоотын хоёрдугаар гудамжинд энэ сарын 20-ны 12:36 цагт “HOWO” маркийн автомашин айлын хашаа, байшинг мөргөсөн ноцтой осол гарчээ. Уг ослын улмаас хүний амь нас эрсдээгүй ч жолооч нь хөнгөн бэртсэн байна.

Хэргийг тодруулбал, тус автомашиныг 25-32 насны иргэн жолоодож явсан бөгөөд жолоочийн зүүн хөл хөнгөн бэртсэн байна. Ослоор байшингийн нэг хэсэг, хашаанд байсан гэр, автомашины граш зэргийг мөргөж хохирол учруулсан байна.

Байшинд бага насны хүүхэдтэй нэгэн эмэгтэй байсан бөгөөд гэмтэж, бэртээгүй байна. Ослын шалтгаан болон бусад зүйлсийг шалгаж байгаа юм.

СЭРЭМЖЛҮҮЛЭГ: Зам тээврийн хөдөлгөөнд оролцож байгаа том оврын автомашины жолооч та бүхэн автомашины аюулгүй, бүрэн бүтэн байдлаа ханган, замын хөдөлгөөний дүрмээ баримтлан, хурдаа тохируулан хөдөлгөөнд оролцохыг Тээврийн цагдаагийн албанаас анхааруулж байна.