Амны хаалт зүүхийг шаардсан дэлгүүрийн хамгаалагчийг бууджээ

АНУ-ын Мичиган мужийн Флинт хот дахь Фэмили Доллар дэлгүүрт өнгөрсөн долоо хоногийн баасан гарагт буун дуу гарчээ. Дэлгүүрийн хамгаалалтын албаны ажилтан 43 настай Калвин Мюнерлин толгойныхоо ард буудуулж нас барсан байна.

Дэлгүүрээр үйлчлүүлэхээр ирсэн гэр бүлийн охин амны хаалтгүй байсан тул оруулахаас татгалзжээ. Үүнээс болж маргаан гарч хамгаалалтын ажилтныг хороосон хэрэгт охины ээж 45 настай Шармел Тиагийг буруутгаж яллахаар болсон байна. Мичиган нь коронавирусийн халдварын тархалт хамгийн өндөр мужуудын нэг юм. Тус мужид коронавирусийн халдварын 44,000 орчим тохиолдол бүртгэгдэж, 4,100 гаруй хүн нас баржээ.

Тиагийн нөхөр Ларри болон хүү Рамон Бишоп нар халдлага болсны дараа дэлгүүрт орсныг цагдаа нар буруутгаж байна. Шармел Тиагийг баривчлан саатуулж гэр бүлийн бусад гишүүдийг сэжигтнээр нэрлэжээ. Тэднийг аллагын гэмт хэрэгт сэжигтнээр татаж, хууль бусаар зэвсэг эзэмшиж ашигласан хэрэгт буруутгасан байна.

GoFundMe цахим хуудсаар дамжуулан буудуулж амиа алдсан Мюнерлины оршуулгын ёслолд зориулан 100,000 ам.доллар цугларчээ. Түүний найман хүүхэд өнчирч үлдсэн байна.

Дашрамд мэдээлэхэд өнгөрсөн долоо хоногт Мичиган мужид гэртээ байх хорио цээрийн дэглэмийг эсэргүүцсэн жагсаал гарч, жагсаалд оролцогчдын зарим нь зэвсэг барьсан байжээ.

Эх сурвалж: BBC