LIVE: Ц.Эрдэнэбат: З.Энхболд ухуулагчдынхаа цалинг өгөхгүй зугтаачихлаа

УИХ-ын сонгуулийн 22-р тойрог, Баянзүрх дүүрэгт Ардчилсан намаас нэр дэвшин өрсөлдөөд өвдөг шороодсон З.Энхболд сонгуулийн сурталчилгааны хугацаанд ажилласан ухуулагч нарынхаа цалинг өгөхгүй зугтаад байна хэмээн иргэн Ц.Эрдэнэбат манай телевизэд хандлаа.

Хохирогч Ц.Эрдэнэбат:

УИХ-ын сонгуулийн 22-р тойрогт Ардчилсан намаас нэр дэвшсэн З.Энхболд зургадугаар сарын 02-22-ны хооронд ажиллах гэрээг ухуулагч нартай байгуулж ажиллуулсан. Сонгуулийн ухуулагчийн ажлыг ямар хүмүүс хийдэг вэ гэхээр тодорхой эрхэлсэн ажилгүй, өрх толгойлсон эмэгтэйчүүд, захын хорооллын ядруу настай иргэд хийдэг. Бид халуун нартайд нартай гэлгүй, бороотой өдөр бороотой гэлгүй чин сэтгэлээсээ ажилласан. Ухуулагчийн ажлын хөлсийг өдрийн 25,000 байхаар тооцож, нийт сонгуулийн хугацаанд 750,000 төгрөг өгөхөөр тохирч гэрээлсэн. Гэтэл сонгуулийн сурталчилгаа эхэлснээс хойш ухуулагч нартаа 200-300 мянган төгрөг өгөөд үлдэгдлээ өгсөнгүй. Уг нь бол үлдэгдэл төлбөрөө зургадугаар сарын 22-ны өдөр өгөх байсан ч өгөөгүй. Санал хураалтын өдөр хүн бүр 25-30 хүний саналыг өгүүлж байж үлдэгдэл төлбөрөө аваарай гэж хэлж ажиллуулчихаад өнөөдрийг хүртэл өгөхгүй байгаа тул бид бүхэн Баянзүрх дүүргийн тавдугаар хорооны засаг дарга Б.Ган-Эрдэнээс үлдэгдэл төлбөрөө нэхээд сууж байна. Яагаад хорооны Засаг даргаас нэхэж байна гэхээр энэ хүн З.Энхболдын сонгуулийн сурталчилгааны 5-р хороог хариуцсан менежерээр ажилласан учраас нэхэж байгаа юм.

Баянзүрх дүүргийн тавдугаар хорооны Засаг дарга Б.Ган-Эрдэнэ:

Би З.Энхболдын албан ёсны менежер биш. Хорооны Засаг дарга, үүрийн дарга хийж байгаа хүн. Би ямар нэгэн тайлбар өгмөөргүй байна. Ц.Эрдэнэбатаа, би чамд хэлсэн шүү дээ. Процессын ажил нь явагдаж байгаа. Өнөөдрийн дотор үлдэгдэл төлбөрийг өгнө, оруулна гэж ярьсан шүү дээ.