Хөл хорионы дүрэм зөрчсөн үдэшлэгээс болж 13 хүн амиа алджээ

Перугийн нийслэл Лима хотын нэгэн шөнийн цэнгээний газар өнгөрөгч бямба гарагт хөл хорионы дүрэм журам зөрчин, хууль бус үдэшлэг зохион байгуулж байжээ. Удалгүй цагдаа коронавирусийн үеийн хязгаарлалтыг хэрэгжүүлэхээр ирэхэд үймээн самуун дэгдэн, хүмүүс бөөнөөрөө зугтах үеэр дор хаяж 13 иргэн олон хүний хөлд дарагдан амиа алдсан байна.

Хэдий тус улсад онц байдал зарлан, ийм төрлийн олон нийтийн цугларалтыг хориглоод байгаа ч Лос Оливос дүүргийн "Thomas Restobar" клуб нууц үдэшлэг зохион байгуулсан бөгөөд тус газарт нийт 120 хүн цуглараад байжээ. Тус шөнийн цэнгээний газрын эргэн тойрны оршин суугчид энэ талаар 21:00 цагийн орчимд албаныханд мэдэгдсэн бөгөөд үүний дараахан цагдаа нар тус арга хэмжээг зогсоон, цугларсан иргэдийг тараахаар ирсэн аж.

Гэвч сандарсан иргэд бөөнөөрөө нэг гарцаар зугтахыг оролдон, хүмүүс бусдын хөлд гишгүүлэн, шатны хэсэгт шахуулан, гацсан байна. Энэхүү эмх замбараагүй байдлын улмаас 13 хүн амиа алдаж, зургаан хүн бэртэж, гэмтсэн гэв. Бэртсэн зургаан хүний гурав нь цагдаагийн ажилтан байсан гэнэ.

Түүнчлэн хууль хяналтынхан нийт 23 хүнийг саатуулаад байгаа аж. Мөн уг шөнийн цэнгээний газрын хоёр эзэн болох гэрлэсэн хосыг саатуулаад байгаа гэнэ. Засгийн газрын холбогдох удирдлагууд "хариуцлагагүй бизнес эрхлэгчид"-ийн улмаас амиа алдсан иргэдийн ар гэрийнхэнд эмгэнэл илэрхийлсэн бөгөөд цагдаа нар хэргийн газарт ямар ч зэвсэг, нулимс асгаруулагч хий ашиглаагүй гэдгийг онцолсон юм.

Тэгвэл саатуулагдсан хүмүүсийн 15 нь коронавирусээр оношлогдсон болохыг эрүүл мэндийн албаныхан удалгүй мэдэгдсэн бөгөөд тэдний 13 нь идэвхтэй халдварын үе дээрээ байсан байна. Перуд одоогоор 600 мянга гаруй хүн коронавирусээр өвчлөн, 27 мянган гаруй хүн нас бараад байгаа юм.

Эх сурвалж: npr.org