Тагнуулын ажилтнуудын зэвсэгт дээрмийн хэргийг шүүхэд шилжүүлжээ

Тагнуулын байгууллагын ажилтнууд нийлж манай улсын харьяат Н.Пүрэвдаш, ОХУ-ын иргэн Ю.Ю.Горшков нарыг дээрэмдсэн хэрэг энэ оны нэгдүгээр сард гарсан.

ТЕГ-ын тусгай бүлгийн ажилтнууд болох М.Мөнхцогт, Ц.Намжилцогт, Г.Доржсүрэн, Я.Баярсайхан, Б.Төгөлдөр, Т.Лхагвасүрэн нар тэднээс 50 000 ам.доллар, 2500 еврог дээрэмдсэн хэрэгт холбогдсон бөгөөд ЭЦА, тагнуулын байгууллагынхантай хамтран мөрдөн шалгах ажиллагаа явуулж дээрх хүмүүсийг илрүүлсэн юм.

Тэд хэргийн газарт тагнуулын байгууллагын дансанд бүртгэлтэй зүйл үлдээсэн нь эд мөрийн хөдөлбөргүй баримт болжээ. Уг хэргийг МБА-ны Тусгай субъектийн үйлдсэн гэмт хэргийг мөрдөн шалгах хэлтэст үргэлжлүүлэн шалгаж, НПГ-аас хяналт тавьсан гэнэ.

Улмаар Эрүүгийн хуулийн 17.2-2 дахь хэсэгт заасан “Бусдын эд хөрөнгийг хүч хэрэглэж, хүч хэрэглэхээр заналхийлж авахаар довтолсон”, 18.6-1 дэх хэсгийн мөнгө угаасан гэх үндэслэлээр яллах дүгнэлт үйлдэж, Баянзүрх дүүргийн Эрүүгийн хэргийн анхан шатны шүүхэд шилжүүлээд байна. Тус шүүх эл хэргийг ирэх баасан гаргийн 13.30 цагт хаалттай хэлэлцэхээр товлоод байгаа бөгөөд хуралд хохирогчоор ОХУ-ын иргэн Ю.Ю.Горшков, Н.Пүрэвдаш нар, гэрчээр түүний дүү, “Бурхан халдун групп” ХХК-ийн захирал Н.Мөнхдаш оролцох аж.