LIVE: С.Эрдэнэ: Би Ардчилсан намын дарга

Ардчилсан намын дарга асан С.Эрдэнэ өнөөдөр Ардчиллын өргөөнөөс хэвлэлийн бага хурал хийлээ. УБЕГ-ын байцаагчийн дүгнэлтээр АН-ын даргын үүргийг түр гүйцэтгэгч Ц.Тувааны тамгыг хүчингүй болгосон учир АН өнөөдрөөс хуучин байрандаа үйл ажиллагаа явуулж эхэллээ хэмээн тэрээр мэдэгдэв. 

С.Эрдэнэ:

-Би Ардчилсан намын дарга хэвээр байгаа. Хэвээр байгааг, Ц.Тувааны тамга хүчин төгөлдөр бус гэдгийг УБЕГ-ын байцаагчийн дүгнэлт баталлаа. Ц.Тувааны тамга хүчингүй болсон. Тамгаа сэргээн авах эрх надад шилжсэн. Тамгаа хийлгэнэ. Иймд өнөөдрөөс АН хуучин байрандаа үйл ажиллагаа явуулж эхэллээ. АН-ын ХЭГ-ын даргаар А.Цэрэнбат томилогдсон. Бусад бүтцүүд удахгүй бүрдээд явна. 

Улсын дээд шүүх /УДШ/ дээр С.Эрдэнэ АН-ын дарга гэдэг хэвээр байгаа. Харин цахим мэдээллийн сан дээрээ Ц.Тувааны үүрэг гүйцэтгэгч гэдгийг тэмдэглэсэн алдаагаа холбогдох хүмүүс нь засна гэсэн. 

АН-ын үндсэн дүрэм зөрчигдөөд зургаан сар боллоо. Энэ хугацаанд би энэ тухай Ц.Туваанд зөндөө хэлсэн. АН-ын үндсэн дүрмийг бид гурван жил намын гишүүдээрээ хэлэлцүүлж батлаад хоёр жил болоогүй байхад дахин өөрчилсөн нь хууль бус, дүрмийн бус. Үүнийг би хуйвалдаан гэж үзэж байгаа. Шинэчилсэн дүрмийн 5.14.2.1 зүйл заалтад хэн нэг этгээдийг илт давуу байдлаар батлуулах заалт орсон. 

-Таны энэ үйлдэл АН-ыг хоёр хувааж байгаа бус уу? 

-АН хоёр хуваагдаагүй. Харин ч нэгдмэл бүтэцтэй явуулж эхэлнэ. Зарим нэг хүний дүрмийн бус үйл ажиллагаанаас болж нам хуваагдахгүй. 

-Сонгуульд ялагдсаны дараа та намаа байрнаасаа хөөсөн юм биш үү? 

-АН-ыг байргүй болгосон хүн нь би биш. Намайг намын дарга болоход байсан хоёр байрыг нь хоёуланг нь зарсан байсан. Иймд би өөрийн байрандаа оруулж, дөрвөн жил зөвхөн урсгал зардлаар нь авч явсан. Гэтэл нэг өдөр пижигнээд гараад явчихсан. Явж явж АН-ыг самарсан хүний байранд яваад орчихсон. 

-Ерөнхийлөгч Х.Баттулга АН-аас дахин нэр дэвших эрхтэй юу? 

-Одоогийн Ерөнхийлөгч манай намын хүн биш, нам биш. Ямар нэг байдлаар энэ хүний асуудлыг шийдвэрлэх боломж байхгүй. Хэрэв дахин нэр дэвших тухай яригдвал намын үндсэн дүрмийг зөрчсөн эсэх асуудал яригдана. Ерөнхийлөгчийн сонгуульд нэр дэвших хүнийг намын гишүүд сонгодог болохоос хэсэг бусаг хуйвалдагч нар сонгох эрхгүй. Тэрнээс Х.Баттулга бид хоёрын хооронд булаалдах юм юу ч байхгүй.