Булганы Орхон сумын Засаг дарга нас барсан хэрэгт хэсгийн төлөөлөгчийг шалгаж байна

Булган аймгийн Орхон сумын Засаг дарга, аймгийн ИТХ-ын тэргүүлэгч, Орхон сумын ИТХ-ын төлөөлөгч С.Б энэ сарын 3-4-нд шилжих шөнө нас баржээ.

Цагдаагийн байгууллагад энэ тухай мэдээлэл 4-ний өглөө ирсэн бөгөөд тус аймгийн Цагдаагийн газраас ажлын хэсэг гарч хэргийн газрын болон талийгаачийн цогцост үзлэг хийжээ. Тэрбээр бусдад зодуулж, хөмсөг нь сэтэрсэн, нүдэнд нь цус хурсан, шүд, буйл нь гэмтсэн байсан аж. Гэрчүүд, талийгаачийн ар гэрийнхнийх нь “Өнгөрсөн долоо хоногийн лхагва гаргийн үдэш буюу ажлын бус цагаар, айлд сумын хэсгийн төлөөлөгч, хошууч Б, нэгэн хүнсний дэлгүүрийн эзэн нарын хамт архи уусан, тэр үеэрээ маргалдаж муудалцсан” хэмээн мэдүүлсэн аж.

Үүнд нь үндэслээд хэсгийн төлөөлөгч болон дэлгүүрийн эзнийг нь холбогдуулан МБА-ны Тусгай субъектийн үйлдсэн гэмт хэрэг мөрдөн шалгах хэлтэст шалгаж байна.