Хятадын их сургуульд хэрхэн гэрлэхийг зааж байна

БНХАУ-ын Шанхай хотын нэгэн их сургууль оюутнууддаа хэрхэн гэрлэхийг заадаг хичээлийг бүтээн, хэрэгжүүлж эхэлсэн байна.

Хичээлийн үеэр оюутнууд гэрлэж буй хос болон жүжиглэж, хуримын ёслолын дүрэм журмыг суралцдаг аж. Энэхүү курс нь оюутнуудад гэрлэлтийн талаар илүү сайн ойлгуулж, хуримын төлөвлөлтийн талаар сургахад зориулагдсан гэж тус хичээлийг ордог багш нь хэлжээ.

Тус их сургуулийн нэгэн оюутан "Хуримын арга хэмжээний төлөвлөлт, менежментийн сургалт нь Шанхайн Технологийн Дээд Сургуулийн оюутнуудад зориулсан сонгомол хичээл. Бид гэрлэх ёслолтой холбоотой зан заншил, үйл явц болон хуримын арга хэмжээг хэрхэн зохион байгуулах талаар сурч мэдсэн" хэмээн тайлбарласан байна.

Уг хичээлийн үеийн нэгэн бичлэг нь Хятадын цахим ертөнцөд тренд болон, олон хүний анхаарлыг татжээ. Зарим иргэд энэхүү хичээлийг оюутнуудад гэрлэлтийн утга учрыг ойлгоход нь тусалсан маш сонирхолтой туршлага болно гэж үзэж байгаа юм.

Эх сурвалж: Global Times