? LIVE: ОХУ, БНХАУ хоёулаа 9 дүгээр сард шатахуун нийлүүлж чадахгүй гэж мэдэгджээ

Уул уурхай, хүнд үйлдвэрийн сайд Г.Ёндон нарын албаны хүмүүс шатахууны хомстолын талаар тайлбар хийж байна. ОХУ болон БНХАУ-ын талаас энэ сардаа шатахуун нийлүүлэх боломжгүй, 10 дугаар сард нийлүүлнэ гэж мэдэгджээ. 

Уул уурхай, хүнд үйлдвэрийн сайд Г.Ёндон: 

-Шатахууны хомстол өчигдрөөс илт болж эхэллээ. Монгол улс сард 30-40 мянган тонн АИ-92 шатахуун авдаг. 95 хувийг нь ОХУ-аас, 5-10 хувийг БНХАУ-аас авдаг. Роснефтьтэй хийсэн гэрээний нэг чухал заалт бол "Манай улс сар бүр 28 мянган тонн АИ-92 шатахуун авна, нөгөө тал нь өгөх ёстой" гэсэн байдаг. 

Гэтэл наймдугаар сарын сүүлчээр Роснефть "17 мянган тонн шатахуун нийлүүлэх боломжтой боллоо, Ангарскын завод засварт орно" гэсэн. Иймд бид БНХАУ-ын "Чайна ойл" компанитай гэрээ байгуулан, мөнгөө төлж, вагоны кодоо авсан. Гэтэл БНХАУ-ын талаас бас энэ сард вагон явуулах боломжгүй боллоо гэж мэдэгдлээ.

Мөн, Роснефть сард өгөх ёстой байсан 17 мянган шатахууны энэ сард өгөх боломжгүй боллоо, 10 сарын 1-нд нийлүүлье гэдгээ өчигдөр мэдэгдлээ. Манай албаны хүмүүс ОХУ-д өнөөдөр очсон, маргааш уулзана. 

Шатахуунын нөөцийг аж ахуйн нэгжүүд бүрдүүлэх үүрэгтэй. Шатахууны нөөцийг бүрдүүлэхийн тулд НИК ХК-ийг шинээр байгуулахыг ч үгүйсгэхгүй. 

Нефть импортлогч компаниуд дунджаар дөрөв хоногийн нөөцтэй байна. 5-7 хоног шатахууны хомстол бий болж магадгүй. Түүнээс хойно хэвийн болох тул их хэмжээгээр авч нөөцлөхгүй байхыг хүсэж байна.