Исландын Парламентын 47.6 хувийг эмэгтэйчүүд эзлэх болжээ

Исландын Парламентын сонгуулиар нийт 63 суудлын 30 суудлыг эмэгтэйчүүд авч, тус улсын Парламентын 47.6 хувийг эмэгтэй гишүүд эзлэх болжээ.

Сонгуулийн эцсийн дүн ил болохоос өмнө эмэгтэйчүүд 33 суудал авч, Парламентын 52 хувийг эзлэх болсон гэх мэдээлэл тархаад байсан хэдий ч саналыг дахин тоолсны дараа энэ нь худал мэдээлэл болох нь батлагдсан байна. Хэрэв эмэгтэй гишүүд 33 суудал авсан бол Исланд нь эмэгтэй олонхтой Парламентыг сонгосон Европын анхны улс болох байсан юм.

Одоогийн байдлаар Европын аль ч улс энэхүү 50 хувийн босгыг давж чадаагүй байгаа бөгөөд үүнээс өмнө Швед улс 47 хувь нь эмэгтэй гишүүдтэй Парламентыг сонгож, олонхыг бий болгоход хамгийн ойртож байсан билээ.

Энэ удаагийн сонгуулиар Исландын Парламент дахин зургаан эмэгтэй гишүүнтэй болсон хэдий ч эрэгтэйчүүд олонхын суудалтай хэвээр байгаа аж. Бусад орнуудаас ялгаатай нь Исландын Парламентад эмэгтэй төлөөлөгчийн хууль ёсны квотыг заадаггүй байна.

Тус улс нь хүйсийн эрх тэгш байдлыг хангах чиглэлээр дэлхийд тэргүүлэгч гэж тооцогддог бөгөөд Дэлхийн эдийн засгийн форумын тайлангаар 12 дахь жилдээ дэлхийн хамгийн хүйсийн тэгш эрхтэй улсаар шалгарсан юм. Исландын эрэгтэй, эмэгтэй хүмүүст ижил цалин олгох тухай анхны хууль нь 1961 оноос эхтэй бөгөөд тус улс нь 1980 онд эмэгтэй Ерөнхийлөгчийг сонгосон дэлхийн анхны улс болж байсан билээ.

Сонирхуулахад, одоогийн байдлаар дэлхийн ердөө таван улсын Парламентын суудлын дор хаяж тал хувийг нь эмэгтэйчүүд эзэлдэг байна. Энэ үзүүлэлтээр тэргүүлдэг Руанда улсын Доод танхимын гишүүдийн 61.3 хувийг эмэгтэйчүүд эзэлдэг аж. Үүний араас Куба улс 53.4 хувьтай, Никарагуа 50.6 хувьтай, Мексик, Арабын Нэгдсэн Эмират улс 50 хувьтай жагсдаг юм.

Харин Их Британийн Нийтийн танхимын гишүүдийн 34.2 хувь нь эмэгтэйчүүд бол АНУ-ын Төлөөлөгчдийн танхимын ердөө 27.6 хувийг эмэгтэйчүүд бүрдүүлдэг байна.

Эх сурвалж: BBC