Азербайжан, Арменийн хил дээрх цэргүүд мөргөлдөж, долоон хүн амиа алджээ
Азербайжан болон Арменийн хоорондох хил дээрх цэргүүдийн дунд зэвсэгт мөргөлдөөн болсны улмаас Азербайжаны долоон цэргийн алба хаагч амиа алдаж, 10 хүн шархадсан гэж тус улсын Батлан хамгаалах яамнаас мэдээлжээ.
Тус яамны мэдэгдэлд "11 дүгээр сарын 16-нд болсон байлдааны ажиллагааны үеэр Азербайжаны зэвсэгт хүчний долоон албан хаагч амь үрэгдсэн. Одоо Азербайжан-Арменийн хилийн байдал тогтворжсон" гэж тэмдэглэсэн байна.
Энэхүү мөргөлдөөн эхэлсний дараа ОХУ-ын Батлан хамгаалахын сайд Сергей Шойгу хоёр улсын Батлан хамгаалахын сайд нартай утсаар ярьжээ. Ингээд хоёр талын эрх баригчид байдлыг тогтворжуулах шуурхай арга хэмжээ авсан аж.
Азербайжан болон Арменийн маргаантай бүс нутаг болох Нагорно-Карабах болон Арменийн Сюник мужийн хилийн бүсэд энэ сарын эхээр хурцадмал байдал үүсэж эхэлсэн бөгөөд ийнхүү цэргүүдийн дунд зэвсэгт мөргөлдөөн болоход хүргэжээ.
Эх сурвалж: TASS
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.