Болгарт жуулчны автобус осолдож, 45 хүн амиа алджээ

Болгарын баруун хэсгийн Боснек тосгоны ойролцоо жуулчны автобус осолдож, шатсаны улмаас багадаа 45 хүн амиа алдсан бөгөөд тэдний дунд 12 хүүхэд байжээ. Аврагчид түлэгдсэн долоон хүнийг нийслэл Софи хотын эмнэлэгт хүргээд байгаа аж.

Осол өнөөдөр орон нутгийн цагаар 02:00 цагийн орчимд гарсан бөгөөд автобус хурдны замын хашлага мөргөсний улмаас осолдсон байж болзошгүй гэж албаныхан мэдээлж байна. Гэхдээ энэхүү ослын шалтгааныг эцэслэн тогтоогоогүй байгаа бөгөөд автобус эхлээд шатаж, дараа нь осолдсон, эсвэл осолдсоныхоо дараа галд автсан эсэхийг шинжээчид судалж байгаа юм.

Тус автобус нь Хойд Македоны бүртгэлтэй тээврийн хэрэгсэл байсан бөгөөд ихэнх зорчигч нь тус улсын иргэн байжээ. Хойд Македонийн Гадаад хэргийн сайд Бужар Османигийн хэлснээр, жуулчдын бүлэг нь амралтын өдрүүдээр Туркийн Истанбул хот руу аялаад, нийслэл Скопье руу буцаж байсан аж.

Эх сурвалж: BBC