Энэтхэгийн тариаланчдын эсэргүүцлийн хөдөлгөөн дуусгавар болов

Энэтхэгийн тариаланчид өнгөрсөн жил гаруйн хугацаанд үргэлжлүүлсэн эсэргүүцлийн хөдөлгөөнөө зогсоож байгаагаа мэдэгджээ. Үүнээс долоо хоногийн өмнө тус улсын Засгийн газар тэдний шаардлагыг биелүүлж, хөдөө аж ахуйн хуулийн шинэчлэлийг цуцалсан юм. 

Тариаланчид фермийн бүтээгдэхүүнийг худалдах, үнэ тогтоох, хадгалах журмыг сулруулсан гурван шинэ хуулийг эсэргүүцэж байсан билээ. Эдгээр хууль нь тариаланчдыг том компаниудын эсрэг хүчгүй болгож, амьжиргааг нь сүйрүүлнэ гэж үйлдвэрчний эвлэлүүд үзэж байсан.

Ийнхүү олон мянган тариаланч нийслэл Дели хотын хил дээр буудаллаж, эсэргүүцлийн жагсаал зохион байгуулах болсон бөгөөд өнгөрөгч жил гаруйн хугацаанд олон арван хүн халуун, хүйтэн цаг агаар болон коронавирусийн халдварын улмаас нас барсан юм.

Энэхүү хөдөлгөөн нь Ерөнхий сайд Нарендра Модигийн Засгийн газрын хамгийн том сорилтуудын нэг болсон билээ. Хөдөө аж ахуйн хуулийн шинэчлэл нь тариаланчдад ашигтай тусна гэж хэдэн сарын турш мэдэгдсэний эцэст Моди өнгөрөгч 11 дүгээр сарын 19-нд уг төслийг хүчингүй болгохоо зарлажээ. Мөн жагсаалын үеэр амиа алдсан тариаланчдын ар гэрийнхэнд нөхөн олговор олгохоор тохиролцсон байна.

Үүний дээрээс, тариаланчдын бүлгүүд бүтээгдэхүүний баталгаат үнэ болон тэднийг эрүүгийн хэргээс чөлөөлөх зэрэг бусад шаардлагыг тавьсан бөгөөд Засгийн газраас энэ талаар хэлэлцэхийг зөвшөөрсний дараа жагсаалаа зогсоохоор шийдсэн аж.

Эсэргүүцлийн хөдөлгөөний удирдагч Гурнам Сингх Чаруни "Бид 1 дүгээр сарын 15-нд хэлэлцээрийн хурал хийнэ. Хэрэв Засгийн газар амлалтаа биелүүлэхгүй бол бид жагсаалаа үргэлжлүүлж магадгүй" хэмээн мэдэгджээ.

Эх сурвалж: BBC