? LIVE: Иргэн И.Мөнхжаргал хүчингүй тамгаар АН-ын даргын сунгаа явуулах гэж байна гэв

Ардчилсан нам /АН/-ын ЕНБД Г.Өнөрбаяр, Нийслэлийн АН-ын дэд дарга Д.Энхтуяа, АН-ын хуулийн зөвлөх Г.Батбаяр, АН-ын Дотоод сонгуулийн хорооны дарга Х.Алтанхуяг нар Хөгжлийн банкны луйвар, АН-ын ээлжит бус Их Хурал зарлан хуралдуулах тухай, АН-ын шүүхийн маргаантай асуудал эцэслэгдэн шийдвэрлэгдсэн талаар мэдээлэл өглөө. 

Ардчилсан намын ЕНБД Г.Өнөрбаяр: 

-Хөгжлийн банкны 2012-2016 оны үйл ажиллагаа Засгийн газрын тогтоолоор явж байсан. Гэтэл МАН үнэмлэхүй олонх болсны дараа 2017 онд хуулийг нь өөрчилж, ТУЗ нь бие даан шийдвэр гаргадаг болгосон нь бүх завхралын эхийг тавьсан. Гэтэл одоо бүх бурууг АН руу тохох гэж оролдож байгаа нь жүжиг юм. 

АН-ын Дотоод сонгуулийн хорооны дарга Х.Алтанхуяг: 

-Иргэн И.Мөнхжаргал /О.Цогтгэрэл даргатай АН-ын Дотоод сонгуулийн хорооны дарга.Сур/ нь АН-ын даргын сунгаа явуулахаар ярьж байгаа нь хууль бус юм. УДШ Ц.Туваанд байгаа тамга хүчингүй, С.Эрдэнэд байгаа тамга хүчинтэй гэдгийг сая дахин баталж өгсөн. Үүн дээр одоо маргаан байхгүй болсон. Иймд энэ хууль бус үйл ажиллагаагаа зогсоохыг шаардаж байна. 

АН-ын хуулийн зөвлөх Г.Батбаяр: 

-О.Цогтгэрэл нар тамга, тэмдэг ашиглах хуулийг зөрчиж байна. Эрх зүйн ямар ч чадамжгүй тамгаар АН-ын даргын сунгааг зохион байгуулах гэж байна. 

Хуучин даргатай холбоотой /С.Эрдэнэ бол АН-ын дарга.Сур/ ямар ч маргаан байхгүй. Харин шинэ даргатай холбоотой /О.Цогтгэрэлийг АН-ын даргаар бүртгэх.Сур/ маргаан байгаа учир асуудлаа дотооддоо шийд гэж УДШ удаа дараа шийдвэрлээд байгаа. АН-д одоо шүүхийн маргаан байхгүй болсон гэв.