Р.Чулуун гуайн хачин зөвлөгөө:Тэнэг мангар асуулт тавихаас бүү ич

Ахмад үеийнхний хөдөлмөр зүтгэлийн түүхэн замнал, бахархан дуурайх үлгэр жишээ бүхэн хойч үеийн хүүхэд, залуучуудад юугаар ч сольшгүй өв хөрөнгө болон үлддэг. Өнгөрсөн сарын 27-нд соёлын гавьяат зүтгэлтэн, ахмад сэтгүүлч, гэрэл зурагчин Р.Чулуун гуай оюутан залуустай уулзалт ярилцлага хийж, үнэт зөвлөгөөгөө харамгүй хайрлав.

Тэрбээр “Үнэн”, “Ардын эрх”, “Өнөөдөр” сонинд спортын тоймч, гэрэл зурагчин, албаны даргаар ажиллаж, 20 гаруй ном товхимол, бүтээлээ туурвин, 30 гаруй жил спортын салбарт үнэтэй хувь нэмрээ оруулсаар яваа.

Түүний бичсэн ном болгонд “Зохиолчийн зөвшөөрөлгүй, хэвлэн олшруулбал талархана” гэсэн содон үг зурайх нь тун сонирхолтой.

Р.Чулуун гуайн залууст зөвлөсөн этгээд 14 зөвлөгөө

-Тэнэг мангар мэт асуулт тавихаас бүү ич

- Өдрийн тэмдэглэл хөтөл. Өдөр болгон амжихгүй бол өнжөөд нэг бичиж бай. Үүнийг надад Ардын уран зохиолч Ц.Дамдинсүрэн гуай хэлж байлаа

- Сайн толь бичигтэй бол. Чиний сайн анд нөхөр тэр болно

- Хүссэн ажилдаа орсон бол цалин мөнгөний талаар бүү бод

- Мэдэхгүй гэж хэлэхээс бүү ич. Бүхнийг мэддэг хүн хорвоод байхгүй

- Ном сайн уншиж, зурагт үзэх цагаа багасга

- Залуу хүнийг бүү гол. Өөрөө түүний насан дээр хэн байснаа бод

- Бүтэн сайн өдөр бүтэн сайхан унтаж амар

- “Хоолны мууд зөөгч буруугүй” гэдгийг байнга санаж яв

- Хүний итгэл найдварыг хэзээ ч бүү эвд. Нэгэнт эвдэгдсэн итгэл буцаж эвлэхэд тун хэцүү

- Өдөрт доод тал нь гурван хүн магтаж бай

- Жаахан амжилтаараа бүү онгирч, гайхуул. Өмнө чинь ямар ч хүн сууж байж мэднэ

- Инээвэл инээсэн шиг чанга дуугаар инээ

- Тэнэг хүнтэй бүү марга. Түүнтэй адилхан болно. Хүмүүс та хоёрыг хараад хэн нь тэнэг болохыг ялгахгүй шүү дээ.