Хятад иргэдэд хүүхдүүдээ худалдсан тээгч эхчүүдийг суллажээ

Өнгөрсөн зуны зургадугаар сард Камбож улсад 32 тээгч эхийг баривчилж хориод байсан юм. Тэднийг төрүүлсэн хүүхдүүдээ асарч хамгаалах болзолтойгоор эрх баригчид суллажээ.

Эдгээр тээгч эхчүүд хүүхдүүдээ Хятад үйлчлүүлэгчдэд худалдсан болохыг тогтоогоод байсан юм. Камбож улсад 2016 онд бусдын үр хөврөлийг тээж төрүүлэн биеэ болон хүүхдээ худалдахыг хуулиараа хориглосон. Хэрэв тээгч эх болсон бол 15 жил хүртэл хорих ял оноодог.

Бусдын хүүхдийг тээж төрүүлэх үйлдлийг хүний наймааны гэмт хэрэгт холбогдуулдаг. Энэ хэрэгт холбоотой Хятадын  иргэнийг мөн баривчлаад байгаа аж.

Тээгч эхчүүд төрүүлсэн хүүхдүүдээ худалдахгүй, өөрсдөө өсгөж хүмүүжүүлнэ гэсэн болзолтойгоор суллагдаж байгаа. Эрх баригчид хүүхдүүд үүнд буруугүй тул эхийн хайр халамжийг үзэх ёстой гэж үзсэн байна.

Зүүн өмнөд Азийн орнуудад ойрын жилүүдэд тээгч эхчүүдийн тоо улам бүр нэмэгдсэн. 2014 онд Тайландад тээгч эхээс гарсан хүүхэд дауны синдромтой төрсөн тул захиалга өгсөн Австралийн хос хүүхдээ авч өсгөхөөс татгалзсанаар олны анхааралд өртөх болсон.

Тайландын эрх баригчид энэ хэргийн дараа бусдын хүүхдийг тээж төрүүлэхийг хүний наймаанд тооцож хуулиараа эрс хориглосон нь тус улстай хил залгаа оршдог бусад улс орнуудад энэ төрлийн гэмт хэрэг хөгжих үүсэл шалтгаан болжээ.

Энэтхэг, Шинэ Зеланд, Канад, Дани, Их Британи улсуудад тээгч эх болохыг хориглох ёстой гэж шаардсаар байгаа юм.

Эх сурвалж: www.bbc.com