🔴Эрүүл мэндийн салбарын эмч, ажилчид энэ сарын 13-нд улс даяар ажил хаяна

Монголын эрүүл мэндийн ажилтны Үйлдвэрчний эвлэлийн холбооноос эрүүл мэндийн салбарын эмч, ажилтнуудын цалин хөлс нэмэгдүүлэх асуудалд төр засгийн зүгээс үл тоомсорлосон хандлага гаргаж буйтай холбоотойгоор ээлжит бус XIV өргөтгөсөн хурал хийв.

Эрүүл мэндийн салбарын эмч, ажилтнуудын төлөөлөл төсвийн мөнгийг үр ашиггүй зарцуулж байгааг шүүмжилж, 2026 оны төсвөөс 1.1 их наяд төгрөгийг танах боломжтой зардлуудаас хэмнэхийг шаардсан юм. УИХ-ын гишүүд тойрогтоо хөрөнгө оруулах гэж хичээдэг явдлыг буруушааж, Баян-Өлгий аймагт цэцэрлэгт хүрээлэн барихад 7.5 тэрбум, Ховд аймагт бизнес инкубатор төв барихад, Архангай, Өвөрхангай аймагт зам тавихад 30 тэрбум, Анагаахын их сургуулийн спорт заал барихад 10 тэрбум төгрөг зарцуулахаар төлөвлөснийг жишээ болгон дурдав.

Эдгээр зардлыг түр хугацаанд тэвчиж, эмч, ажилтнуудын цалинг нэмэхийг уриалахдаа хувийн байгууллагууд болон иргэд хийж болох ажлыг төсвөөс санхүүжүүлж буйг шүүмжилж, тодорхой бус зардлуудад 224 тэрбум төгрөг төсөвлөсөн байгааг онцоллоо.

Эрүүл мэндийн салбарын ажилтнууд хүнд нөхцөлд ажиллаж байхад цалингийн асуудлыг нь шийдвэрлэх боломжтой хэдий ч төр засгийн зүгээс хайхрахгүй байгааг мөн тодотгосон юм. Засгийн газраас шийдвэрлэсэн 15 хувийн нэмэгдлийг 2026 онд өгөхөөс өөр боломжгүй гэсэн тайлбарыг хүлээн авах боломжгүй гэж мэдэгдэв.

Түүнчлэн ЭМД-ын сангийн зүй зохисгүй зарцуулалтад хяналт шалгалт хийж, мөнгөө олж авахыг шаардсан юм. Ингээд эрүүл мэндийн салбарт ажил хаяхад гуравхан өдөр үлдсэнийг анхааруулж, эмч, ажилтнуудын үндсэн цалинг 3.5 сая төгрөгт хүргэн нэмэгдүүлэхийг шаардлаа. Ажил хаялтаас гарах үр дагаврыг төр засаг хариуцах ёстойг анхааруулж, ажилтан, албан хаагчдад ирж байгаа дарамт нөлөөллийг тэвчихгүй гэдгээ мөн мэдэгдсэн.

Ковидын үед эрүүл мэндийн салбар амжилттай ажилласныг эмч нарын төлөөлөл дурдаж, "Одоо яагаад уландаа гишгээд байгаа юм бэ?" гэв. Эцэст нь, Эрүүл мэндийн сайдыг салбарынхаа төлөө дуугарч, ажилтнуудынхаа цалинг нэмэхийг шаардав.