🔴А.Ариунзаяа: Төрийн сан хоосорч, данс улайсан асуудал байхгүй

Төрийн албан хаагчид жилийн эцсийн урамшууллаа авч чадахгүй байгаа асуудлаар УИХ-ын гишүүн А.Ариунзаяагаас тодруулав.

УИХ-ын гишүүн А.Ариунзаяа:

-Төрийн сан хоосорч, данс улайсан асуудал байхгүй. Төрийн сан 1.5 их наяд төгрөгийн үлдэгдэлтэй байгаа. Төсөв батлахдаа алдагдлын хувь хэмжээг тодорхой зааж өгсөн. Гэтэл төсвийн орлого бүрдэхгүй байгаа учраас төрийн албан хаагчдын нэмэлт урамшуулал, аймгуудад гэрээгээр гүйцэтгэсэн бусад ажлуудад өгөх ёстой төлбөр гэх мэт төсвийн зарлагыг бариад байгаа юм билээ.

Өнгөрөгч 11 дүгээр сарын байдлаар төсвийн алдагдал 1.6 их наяд төгрөгт хүрчээ. Орлого бүрдэхгүй учраас зарлагаа барьж, батлагдсан хувь хэмжээнд тэнцүүлэх гэж байгаа. Тэгэхээр мөнгө байхгүйдээ биш, зарцуулах эрх хязгаарлагдсан учраас хүндрэлтэй байгаа юм.

Ер нь улсын төсвийн орлого, зарлага, зарцуулах эрхтэй холбоотой маш олон асуудал үүсэж байна. Үүний нэг шалтгаан нь гадаад зээлтэй холбоотой. Гаднаас зээл авчхаад ашиглаж чадахгүй байгаа нь зарцуулах эрх, хувь хэмжээтэй холбоотой. Зээлийг орлого талдаа бүртгэж чадахгүй, зөвхөн зарлага талдаа бүртгээд явж байгаа. Магадгүй Сангийн яам бүртгэлийн системээ шинэчлэх цаг болсон байх. Өнөөдөр гадаад зээлийн ашиглалттай холбоотой гурван төслийг онцолж, зарим гишүүн өргөн барьсан хуулийг хэлэлцэх эсэх нь шийдэгдэж байна гэлээ.