Такси үйлчилгээ эрхлэх аж ахуйн нэгжүүд өөрсдийн хүссэн загварын машинаас сонгоно

НИТХ-ын шийдвэрээр Улаанбаатар хотын такси үйлчилгээний чанар, хүртээмжийг сайжруулахаар 1000 такси оруулж ирж, цогц хөгжүүлэлт хийхээр болсон. Энэ хүрээнд "Зөвхөн Хятад улсаас такси оруулж ирнэ" гэсэн ташаа мэдээлэл олон нийтийн сүлжээнд цацагдаад байна. 

НЗДТГ-ын Хэвлэл мэдээлэл, олон нийттэй харилцах хэлтсээс тодруулахад “Зөвхөн хятад машин оруулж ирнэ гэдэг нь худал мэдээлэл. Такси үйлчилгээг сайжруулах төслийн ТЭЗҮ-д дэлхийн хотуудад такси үйлчилгээнд явж байгаа зорчигчид тухтай, байгаль орчинд ээлтэй арван үйлдвэрийн төрөл бүрийн маркийн автомашинуудыг судалсан. Дараах байдлаар судалгаа хийсэн. Дотоодын зах зээлээс нийлүүлэх боломжтой тээврийн хэрэгсэл, үйлдвэрлэгчээс нийлүүлэх боломжтой тээврийн хэрэгсэл, хямд үнэтэй тээврийн хэрэгсэл гэсэн жагсаалтууд гарсан.

Үүнд, Toyota, Hyundai, Kia, Nissan, Geely, Wuling, Changan, Volkswagen зэрэг дэлхийд тэргүүлэгч, байгальд ээлтэй, зорчиход тухтай үйлдвэрүүдийн машинаас хувийн хэвшлийн аж ахуйн нэгж өөрсдөө сонгож авах боломжтой” гэв.