Туул хурдны замын төслийг зогсоох тогтоолын төслийг Засгийн газарт танилцуулна

Туул хурдны замын төслийг зогсоох тухай тогтоолын төслийг Засгийн газрын маргаашийн хуралдаанд танилцуулахаар болжээ. Олон нийтийн эсэргүүцэл болон байгаль орчны нөлөөллийн асуудлаас үүдэн ийнхүү төслийг зогсоох санал гаргаж байгаа бөгөөд эцсийн шийдвэрийг Ерөнхий сайд Г.Занданшатар гаргах бололтой. 

Нийт 32 километр үргэлжлэх, зургаан эгнээ бүхий энэхүү хурдны зам нь Баянзүрхийн товчооноос баруун талын аюулгүйн тойрог хүртэлх чиглэлд баригдахаар төлөвлөгдсөн. Уг бүтээн байгуулалтад 2.3 их наяд төгрөгийн төсөв зарцуулахаар тооцоолсон бөгөөд Улаанбаатар хотын түгжрэлийг 15-аас 30 хувиар бууруулж, тээврийн хэрэгслийн дундаж хурдыг 7-13 км/цагаас 10-25 км/цаг болгон нэмэгдүүлэх зорилготой байв.

Төслийг эсэргүүцэгчид Туул голын сав газрын экосистем алдагдаж, ундны усны эх үүсвэр бохирдох, мөн их хэмжээний бургас, ой модыг устгах эрсдэлтэйг онцолж байна. Сүүлийн өдрүүдэд иргэд болон байгаль орчныг хамгаалагчид эсэргүүцлийн жагсаал зохион байгуулж, голын голдирол дагуух 32 км гүүрэн байгууламж нь байгаль орчинд нөхөж баршгүй хохирол учруулна гэж үзэж байгаа юм.

Улс төрийн хүрээнд ч уг асуудал маргаан дагуулж байгаа бөгөөд ХҮН намаас ажлын хэсэг байгуулан төслийн эдийн засгийн үр ашиг, байгаль орчны нөлөөллийг хоёр долоо хоногийн хугацаанд хянахаар болжээ. Нөгөө талд, Нийслэлийн Авто замын хөгжлийн газрын дарга Б.Одбаяр төсөл нь ундны усны нөөцөд нөлөөлөхгүй бөгөөд байгаль орчныг нөхөн сэргээхэд 1.5 тэрбум төгрөг төсөвлөсөн хэмээн мэргэжлийн дүгнэлтэд үндэслэн хамгаалж байгаа юм.

Хэрэв Засгийн газар төслийг зогсоох шийдвэр гаргавал 2027 оны долдугаар сард ашиглалтад оруулахаар төлөвлөсөн томоохон бүтээн байгуулалт бүрэн зогсох юм.