Есөн настай хүүгээ жил гаруй машинд хорьсон эцгийг баривчилжээ
Францын зүүн хэсэгт орших Хагенбах тосгонд эцгийнхээ ачааны тэргэнд жил хагас орчим хугацаанд цоожтой байсан есөн настай хүүг цагдаа нар олж аварчээ.
Хөршүүд нь автомашинаас хүүхдийн дуу чимээ гарч байгааг сонсож, хууль сахиулах байгууллагад мэдэгдсэнээр энэхүү ноцтой хэрэг илэрсэн байна. Хүү 2024 оны арваннэгдүгээр сараас хойш уг битүү орчинд хоригдсон бөгөөд одоогоор эмнэлэгт хүргэгдэн эмчлүүлж байна.
Орон нутгийн прокурор Николя Хейтцийн мэдээлснээр, цагдаа нар хаалгыг эвдэн ороход хүү хог хаягдал, ялгадастай хутгалдсан байдалтай, нүцгэн, хөнжлөөр хучигдсан байжээ. Тэрээр удаан хугацаанд суугаа байдлаар хоригдсоны улмаас алхаж чадахгүй болсон төдийгүй хоол тэжээлийн гүн дутагдалд орсон байжээ. Мөрдөн байцаалтын явцад хүү 2024 оны сүүлчээс хойш усанд ороогүй бөгөөд хуванцар сав, гялгар уутанд бие засаж байснаа ярьжээ. Эцэг нь түүнд өдөрт хоёр удаа хоол, ундны ус авчирч өгдөг байсан гэнэ.
Хүүгийн 43 настай эцэг мэдүүлэгтээ 37 настай хамтран амьдрагч нь хүүг сэтгэцийн эмнэлэгт хэвтүүлэхийг шаардсан тул хүүхдээ хамгаалах зорилгоор ийм үйлдэл хийсэн хэмээн тайлбарлажээ. Хүү ч мөн хойд эхтэйгээ таарамжгүй харилцаатай байсан бөгөөд аавд нь өөр сонголт байгаагүй гэж мөрдөгчдөд хэлсэн байна. Гэвч прокурорын зүгээс хүүд сэтгэцийн ямар нэгэн өвчин эмгэг байсан гэх эрүүл мэндийн бүртгэл байхгүй, харин ч сургуульдаа онц сайн сурдаг байсныг онцолсон юм.
Гэмт хэргээ нуун дарагдуулахын тулд эцэг эх нь багш нарт нь хүүг өөр сургууль руу шилжсэн гэж хэлсэн бол хамаатан садан, найз нөхдөдөө сэтгэцийн эмнэлэгт хэвтсэн хэмээн худал ярьж, машинаас гарах чимээг муурных хэмээн хөршүүдээ төөрөгдүүлж байжээ.
Одоогоор хүүгийн эцгийг баривчлан саатуулж, хүн хулгайлсан, насанд хүрээгүй хүнийг хууль бусаар хорьсон, зохих хоол тэжээл, эмнэлгийн тусламжаас санаатайгаар татгалзсан зэрэг хэргээр урьдчилсан байдлаар яллах дүгнэлт үйлдээд байна. Харин хамтран амьдрагч нь хүүг машинд хоригдож байсныг мэдээгүй гэж мэдүүлсэн бөгөөд аюулд орсон хүүхдэд тусламж үзүүлээгүй, хүчирхийллийг мэдээлээгүй гэх үндэслэлээр шүүхийн хяналтад суллагджээ. Мөн тэдний хамт амьдарч байсан 12 болон 10 настай хоёр охиныг гэрээс нь гаргаж, нийгмийн халамжийн байгууллагын асрамжид шилжүүлсэн байна.
Энэхүү цочирдом хэрэг нь хүүхдийн эсрэг хүчирхийлэл, үл хайхрах байдал ямар ноцтой түвшинд хүрч болохыг харуулсан эмгэнэлтэй жишээ боллоо. Францын хууль сахиулах байгууллагынхан хүүг хорьсон талаар өөр хэн нэгэн мэдэж байсан эсэхийг тогтоохоор мөрдөн шалгах ажиллагааг үргэлжлүүлж байна. Цаашид хүүгийн биеийн болон сэтгэл зүйн эрүүл мэндийг сэргээх, гэмт этгээдүүдэд хуулийн хатуу хариуцлага хүлээлгэх үйл явц хэрхэн өрнөх нь олон нийтийн анхаарлын төвд үлдэж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.