Гэрлээгүй хүмүүсийн хорт хавдраар өвчлөх эрсдэл өндөр байдаг
АНУ-ын Майамигийн их сургуулийн судлаачид хэзээ ч гэрлэж байгаагүй насанд хүрэгчдийн хорт хавдраар өвчлөх магадлал гэрлэж байсан хүмүүсийнхээс хамаагүй өндөр байгааг тогтоожээ.
2026 оны 4-р сарын 8-нд "Cancer Research Communications" сэтгүүлд нийтлэгдсэн уг судалгаагаар гэрлээгүй эрэгтэйчүүдийн хавдрын өвчлөл 68 хувиар, харин эмэгтэйчүүдийнх 83-85 хувиар илүү байгааг онцолсон байна.
Доктор Пауло С.Пинейрогоор ахлуулсан "Sylvester" хавдар судлалын төвийн баг 2015-2022 оны хооронд бүртгэгдсэн 4.24 сая орчим хорт хавдрын тохиолдлыг шинжилжээ. Тэд АНУ-ын 12 мужийн мэдээллийн санг ашиглан огт гэрлээгүй хүмүүсийг одоо гэрлэлттэй байгаа, салсан эсвэл бэлэвсэн хүмүүсийн бүлэгтэй харьцуулан судалсан байна. Насны хувьд 55-аас дээш насныханд ялгаа илүү тод ажиглагдсан бөгөөд гэрлэлтийн байдалтай холбоотой нийгэм, зан үйлийн хүчин зүйлс хүний амьдралын туршид хуримтлагддагийг харуулжээ.
Судалгааны үр дүнд арьсны өнгө болон хавдрын төрлөөс хамаарсан ноцтой ялгаанууд илэрсэн байна. Тухайлбал, огт гэрлээгүй өнгөт арьст эрэгтэйчүүд хавдрын өвчлөлөөр тэргүүлсэн бол гэрлэсэн өнгөт арьст эрчүүдийн өвчлөл цагаан арьстнуудаас бага байжээ.
Өвчний төрлөөр авч үзвэл, гэрлээгүй эрчүүдийн шулуун гэдэсний хавдраар өвчлөх эрсдэл тав дахин, гэрлээгүй эмэгтэйчүүдийн умайн хүзүүний хавдрын эрсдэл гурав дахин өндөр байв. Мөн тамхи, архи болон вирусийн гаралтай хавдрын тохиолдол ганц бие хүмүүсийн дунд илүү их бүртгэгдсэн байна.
Эрдэмтэд гэрлэлт нь өөрөө эмчилгээ биш боловч эрүүл мэндийг дэмжих хүчин зүйл болдог гэж тайлбарлаж байна. Гэрлэсэн хүмүүс эмнэлгийн үзлэгт тогтмол хамрагдах, эмчилгээний дэглэм баримтлахад нь туслах гэр бүлийн дэмжлэгтэй байдаг төдийгүй эдийн засгийн хувьд илүү тогтвортой байдаг. Харин гэрлээгүй хүмүүсийн хувьд хорт зуршилд автах магадлал өндөр, эрүүл мэндийн урьдчилан сэргийлэх үзлэгт хамрагдах нь бага байдаг аж. Түүнчлэн эмэгтэйчүүдийн хувьд хүүхэд төрүүлэх нь дааврын өөрчлөлтөөр дамжуулан нөхөн үржихүйн эрхтний хавдраас хамгаалах эерэг нөлөө үзүүлдэг байна.
Нийгмийн эрүүл мэндийн мэргэжилтнүүд, тэр дундаа судалгааны хамтран зохиогч доктор Фрэнк Пенедо гэрлээгүй байх нь эрүүл мэндийг тодорхойлогч нийгмийн чухал хүчин зүйл болохыг анхаарууллаа. Тиймээс хорт хавдраас урьдчилан сэргийлэх бодлого, стратеги нь ганц бие хүмүүст илүү чиглэж, тэдний эрүүл мэндийн боловсролыг дээшлүүлэх, эрт илрүүлэгт хамруулах, нийгмийн дэмжлэг үзүүлэх замаар эрүүл мэндийн тэгш бус байдлыг арилгахад анхаарах шаардлагатайг шинжлэх ухааны энэхүү нээлт баталж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.