Дизель түлшний үнийн өсөлт Австралийн тээврийн салбарыг хямралд орууллаа
Ойрхи Дорнодод хурцадсан геополитикийн мөргөлдөөний улмаас дизель түлшний үнэ түүхэн дээд хэмжээнд хүрч, Австралийн ачаа тээвэр, ложистикийн салбар урьд өмнө байгаагүй хүнд хямралд өртөөд байна.
АНУ болон Израилийн хүчнийхэн Ираны Дээд удирдагч Аятолла Али Хаменеигийн амь насыг хөнөөсний дараа Иран улс Ормузын хоолойг хааснаар дэлхийн газрын тосны нийлүүлэлтийн 20 хувь тасалдаж, энэ нь Австралийн шатахууны зах зээлд шууд бөгөөд хүчтэй цохилт боллоо.
Дэлхийн зах зээл дээрх нийлүүлэлтийн гэнэтийн тасалдал нь импортын шатахуунаас гүн хамааралтай тус улсын дотоод зах зээлд шууд нөлөөлсөн байна. Гуравдугаар сарын эхнээс сүүл хүртэлх хугацаанд Австрали даяар дизель түлшний бөөний үнэ 80-87 хувиар огцом өсжээ. Тухайлбал, Мельбурн хотод нэг литр дизель түлшний үнэ 165.6 центээс 295.1 цент хүртэл өссөн үзүүлэлттэй байна. Үүний зэрэгцээ хомстол үүсэхээс болгоомжилсон худалдан авагчид ердийн хэрэглээнээсээ дөрвөөс тав дахин их хэмжээгээр нөөцөлж эхэлсэн нь богино хугацааны шатахууны зах зээлийг улам хүндрүүлжээ.
Газар нутгийн хэмжээ асар том тул бараа бүтээгдэхүүн түгээхэд авто тээвэр онцгой үүрэг гүйцэтгэдэг.
Хүнд даацын автомашины үйл ажиллагааны зардлын 17-22 хувийг түлш эзэлдэг байсан бол өнөөдрийн байдлаар тээвэрлэгчдийн зардал хоёр дахин нэмэгдсэн байна. Виктория мужийн Тээврийн холбооноос шатахууны биет хомстолоос илүүтэйгээр үнийн хэт өсөлт нь компаниудын үйл ажиллагааг зогсооход хүргэж байгааг онцолжээ.
Австралийн Ачаа тээврийн холбооноос тээвэрлэгчид нэмэлт зардлаа хэрэглэгчдэд шилжүүлэхээс өөр аргагүй байдалд хүрснийг анхааруулж, өргөн хэрэглээний барааны үнэ огцом өсөх эрсдэлтэйг санууллаа.
Нөхцөл байдлыг тогтворжуулахын тулд Холбооны засгийн газар, тэр дундаа Уур амьсгалын өөрчлөлт, эрчим хүчний сайд Крис Боуэн салбарын төлөөллүүдтэй яаралтай уулзалтууд зохион байгуулж байна. Засгийн газраас улсын хэмжээнд 30 гаруй хоногийн дизель түлшний нөөцтэй байгааг баталгаажуулж, дотоодын нөөцөөс 762 сая литр хүртэлх шатахууныг яаралтай горимоор зах зээлд нийлүүлэх шийдвэр гаргав. Гэсэн хэдий ч АНУ болон Ираны хоорондын энхийн хэлэлцээ мухардалд орсон тул дэлхийн зах зээл дээрх нийлүүлэлтийн тасалдал цаашид ч үргэлжлэх төлөвтэй байгаа нь эдийн засагт урт хугацааны дарамт учруулах эрсдэлийг дагуулсаар байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.