АНУ болон Ираны түүхэн хэлэлцээ үр дүнгүй өндөрлөлөө
АНУ болон Иран улсын хооронд 1979 оны Исламын хувьсгалаас хойш анх удаа зохион байгуулагдсан хамгийн өндөр түвшний нүүр тулсан уулзалт ямар нэгэн тохиролцоонд хүрч чадалгүй бүтэлгүйтлээ. Пакистан улсын нийслэл Исламабад хотноо 21 цаг гаруй үргэлжилсэн энэхүү түүхэн дээд хэмжээний хэлэлцээ ням гарагийн өглөө үр дүнгүй өндөрлөж, талууд өөрсдийн нийслэл рүү буцжээ.
Хоёр улсын төлөөлөгчид дөрөвдүгээр сарын 11-нээс 12-нд шилжих шөнө хуралдаж, өглөөний 06:30 цагт хэлэлцээг зогсоожээ. Америкийн талыг Дэд ерөнхийлөгч Ж.Д.Вэнс ахалж, тусгай элч Стив Виткофф, Жаред Кушнер нар бүрэлдэхүүнд нь багтсан байна. Харин Ираны төлөөлөгчдийг тус улсын Парламентын дарга Мохаммад Багер Галибаф болон Гадаад хэргийн сайд Аббас Арагчи нар удирдан оролцжээ.
Уулзалт мухардалд орох болсон гол шалтгаан нь цөмийн хөтөлбөр болон бүс нутгийн аюулгүй байдлын асуудлууд байв. Вашингтоны зүгээс Тегераныг цөмийн зэвсэг үйлдвэрлэхгүй байх, бүх баяжуулсан уранаа хүлээлгэж өгөх хатуу шаардлага тавьсныг Ираны тал эрс няцаасан байна. Түүнчлэн Ормузын хоолойгоор дамжин өнгөрөх худалдааны хөлөг онгоцнуудаас татвар авах, хяналт тогтоох Ираны саналыг Америкийн төлөөлөгчид хүлээж аваагүй юм.
Ойрхи Дорнодын хурцадмал байдал нь мөн л талуудын санал зөрөлдөх томоохон цэг болсон байна. Иран улс Израилын армиас Хезболла бүлэглэлд өгч буй цохилтыг яаралтай зогсоох шаардлага тавьсан бол, АНУ-ын зүгээс Тегераныг бүс нутаг дахь зэвсэгт бүлэглэлүүдээ санхүүжүүлэхээ зогсоохыг шаарджээ. Ийнхүү хоёр тал эцсийн санал дээрээ харилцан буулт хийж чадаагүй тул хэлэлцээг орхиход хүржээ.
Энэхүү уулзалт бүтэлгүйтсэнээр дөрөвдүгээр сарын 22-нд дуусах 14 хоногийн түр гал зогсоох хэлэлцээр цаашид үргэлжлэх эсэх нь тодорхойгүй болж, Ойрхи Дорнодын нөхцөл байдал дахин хурцдах эрсдэл үүслээ. АНУ-ын Ерөнхийлөгч Доналд Трамп Ормузын хоолойгоор дамжин Иранд татвар төлсөн бүх хөлөг онгоцны хөдөлгөөнийг Тэнгисийн цэргийн хүчээр хааж, бүслэлт хийхээ мэдэгдсэн нь нөхцөл байдлыг улам хурцатгаж байна. Дэлхийн зах зээл дээр ч энэхүү мэдээний нөлөөгөөр газрын тос болон байгалийн хийн үнэ огцом нэмэгдэх хандлага ажиглагдаж байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.