Өмнөд Солонгосын Ерөнхийлөгчийн мэдэгдэл Израилтай дипломат маргаан үүсгэжээ
Өмнөд Солонгосын Ерөнхийлөгч Ли Жэ Мён Израилийн цэргийн ажиллагааг шүүмжилж, түүхэн эмгэнэлт явдлуудтай зүйрлэсэн мэдэгдэл хийснээр хоёр улсын хооронд ноцтой дипломат маргаан дэгдээд байна. Тэрээр цахим хуудсандаа Палестин хүүхдийн эрхийг зөрчиж буй бичлэг хуваалцаж, уг үйлдлийг Еврейчүүдийн Холокост болон Солонгосын "тайтгаруулагч эмэгтэйчүүд"-ийн асуудалтай адилтгасан нь олон улсын анхаарлын төвд орлоо.
Энэхүү хурцадмал байдал нь дөрөвдүгээр сарын 10-ны өдөр Ерөнхийлөгч Ли Жэ Мён өөрийн "X" цахим хуудсандаа нийтэлсэн мэдээллээс эхтэй юм. Тэрээр Израилийн цэргүүд Палестин хүүхдийг эрүүдэн шүүж, барилгын дээвэр дээрээс шидэж байгааг харуулсан гэх бичлэгийг олон нийтэд хуваалцжээ. Улмаар уг мэдээллийг баталгаажуулах шаардлагатайг онцлоод, хэрэв үнэн бол дайны үеийн энэхүү хүн амины хэрэг нь хүн төрөлхтний түүхэн дэх хамгийн ноцтой гэмт хэргүүдтэй энэ тэнцэхүйц үйлдэл хэмээн хатуу байр суурь илэрхийлсэн байна.
Израилийн Гадаад хэргийн яамнаас уг мэдэгдлийг эрс эсэргүүцэж, хүлээж авах боломжгүй, хатуу зэмлэн буруушаах ёстой үйлдэл хэмээн мэдэгдлээ. Израилийн талын тайлбарласнаар, Ерөнхийлөгчийн хуваалцсан бичлэг нь 2024 онд болсон, аль хэдийн шалгагдаж шийдэгдсэн хуучин хэрэг бөгөөд хуурамч хаягнаас авсан эсрэг талын суртал ухуулга гэж үзжээ. Түүнчлэн Еврейчүүдийн хядлагыг дурсдаг өдрөөр Израилийн цэргийн ажиллагааг Холокосттой зүйрлэсэн нь тэдний хувьд хамгийн их дургүйцэл төрүүлсэн эмзэг асуудал болсон байна.
Шүүмжлэлийн хариуд Ли Жэ Мён ухралт хийсэнгүй, харин ч Израилийн тал олон улсын хүний эрхийн шүүмжлэлийг хүлээж авахгүй байгаад харамсаж буйгаа илэрхийлжээ. Тэрээр "Хүндэтгэлийг хүндэтгэлээр олж авдаг" гэсэн зарчмыг сануулж, хүний эрх, олон улсын хууль тогтоомжийг ямар ч нөхцөлд дагаж мөрдөх ёстойг бататгасан юм. Нөхцөл байдлыг зөөлрүүлэх зорилгоор Өмнөд Солонгосын Гадаад хэргийн яамнаас албан ёсны тайлбар хийж, Ерөнхийлөгчийн үг нь тодорхой нэг улс руу чиглээгүй, зөвхөн түгээмэл хүний эрхийг хамгаалах үзэл санааны илэрхийлэл байсан хэмээн дипломат аргаар намжаахыг оролдож байна.
Энэхүү үйл явдал нь 60 гаруй жилийн түүхтэй Өмнөд Солонгос болон Израил улсын дипломат харилцаанд сүүлийн жилүүдэд огт гарч байгаагүй томоохон хэмжээний ан цав үүсгэлээ. Хүний эрхийн түгээмэл үнэт зүйлс болон улс орнуудын түүхэн эмзэг сэдвүүд хэрхэн огтлолцож, олон улсын тавцанд хурцадмал байдал үүсгэж болохыг энэ удаагийн маргаан тод харуулж байгаа бөгөөд цаашид хоёр орны хамтын ажиллагаанд хэрхэн нөлөөлөх нь ажиглагчдын анхаарлыг татсан хэвээр байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.