Кени улсын хилээр шоргоолж хил давуулахыг завдсан Хятадын иргэн хоригдох ял сонсжээ
Кени улсын нийслэл Найроби хотын шүүхээс 2026 оны дөрөвдүгээр сарын 15-ны өдөр олон мянган амьд шоргоолж хил давуулахыг завдсан Хятадын иргэнд 12 сар хорих ял, 1 сая кени шиллинг буюу 7700 орчим ам.долларын торгууль ногдуулжээ.
Тэрээр дэлхий даяар өсөн нэмэгдэж буй чамин тэжээвэр амьтны эрэлт хэрэгцээг хангах зорилгоор эдгээр шавжийг хууль бусаар тээвэрлэхийг оролдсон байна.
Хэрэгтэн өнгөрөгч гуравдугаар сарын 10-нд Найроби дахь Жомо Кениатагийн олон улсын нисэх онгоцны буудлаас БНХАУ руу нисэхээр аюулгүй байдлын шалгалтаар орох үедээ баригджээ.
Эрх баригчид түүний ачаанаас 2200 гаруй амьд шоргоолж, тэр дундаа 1948 ширхэг Африкийн аварга ургац хураагч шоргоолж (Messor cephalotes) илрүүлсэн байна. Мөрдөн байцаалтын явцад тэрээр шоргоолжийг амьдаар нь авч явахын тулд тусгай зориулалтын туршилтын шилэн хоолойд 1948 хатан шоргоолжийг хийж, үлдсэн 300 орчмыг нь гурван ширхэг ариун цэврийн цаасан дотор нуусан байсныг тогтоожээ.
Шүүгч Ирен Гичоби шүүхийн шийдвэрийг танилцуулах үеэрээ сүүлийн үед шоргоолжны хууль бус худалдаа огцом нэмэгдэж, байгаль экологид сөрөг нөлөө үзүүлж байгаа тул хатуу шийтгэл оногдуулах шаардлагатайг онцолсон юм.
Мөн тэрээр Жан Кэцюнийг хийсэн хэрэгтээ гэмшихгүй байгаа бөгөөд "бүрэн шударга хүн биш" хэмээн тодорхойлжээ. Хэрэгтэн анх зэрлэг амьтныг зөвшөөрөлгүйгээр хил давуулахыг завдсан, хуйвалдсан гэх хэргээр долоон жил хүртэлх хугацаагаар хоригдох ял сонсох эрсдэлтэй байсан ч хуйвалдсан гэх зүйлчлэл нь хэрэгсэхгүй болсны дараа гэм буруугаа хүлээн зөвшөөрсөн байна. Түүний өмгөөлөгч шүүхийн шийдвэрийг давж заалдах төлөвлөгөөтэй байгаагаа мэдэгдсэн бөгөөд 14 хоногийн давж заалдах хугацаа дууссаны дараа түүнийг эх орон руу нь албадан буцаах аж.
Африкийн аварга ургац хураагч шоргоолж нь дэлхийн биологийн олон янз байдлын гэрээгээр хатуу зохицуулагддаг боловч Хятад, АНУ, Европын цуглуулагчдын дунд маш их эрэлттэй байдаг. Нэг бүр нь ойролцоогоор 100 ам.долларын үнэд хүрдэг эдгээр шавжийг сонирхогчид "формикариум" хэмээх тунгалаг, том саванд тэжээж, тэдний нийгмийн нарийн бүтэц, зан үйлийг ажиглахын тулд асар их мөнгө төлдөг байна.
Кени улсын зэрлэг амьтан хамгаалах албаны мэргэжилтнүүдийн анхааруулж буйгаар эдгээр шоргоолж нь хөрсийг сийрэгжүүлэх, биологийн олон янз байдлыг хадгалахад амин чухал үүрэгтэй тул байгаль дээрээс олноор нь барьж устгах нь экосистемд ноцтой аюул учруулдаг гэнэ. Энэхүү хэрэг нь Зүүн Африкт шоргоолжны хууль бус худалдаа ашигтай бизнес болж хувирсныг харуулж байна.
Өмнө нь 2025 оны тавдугаар сард Кени улсад 5000 орчим шоргоолж хил давуулахыг завдсан дөрвөн хүн мөн л 7700 орчим ам.доллароор торгуулж байсан бөгөөд эрх баригчид энэ төрлийн гэмт хэрэгтэй тэмцэх хяналтаа улам чангатгах хандлагатай байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.