Японы Киото мужид 11 настай хүүгээ хөнөөсөн хойд эцгийг баривчилжээ
Японы Киото мужийн Нантан хотод 11 настай дагавар хүүгийнхээ аминд хүрч, цогцсыг нь нуун дарагдуулсан ноцтой хэрэг гарчээ. Тус мужийн цагдаагийн газар гурван долоо хоног орчим үргэлжилсэн эрэн хайх ажиллагааны үр дүнд 37 настай Юүки Адачи гэгчийг сэжигтнээр татаж, албан ёсоор баривчлан саатуулсан байна.
Хохирогч болох 11 настай Юки Адачи хүү өнгөрсөн гуравдугаар сарын 23-ны өдөр сургууль руугаа явахаар гэрээсээ гарснаас хойш сураггүй болсон юм. Хэрэг явдлын эхэнд хойд эцэг нь хүүг сургуулийнх нь ойролцоо автомашинаасаа буулгаж үлдээсэн хэмээн мэдүүлж байжээ. Гэвч цагдаа нар сургуулийн орчмын хяналтын камеруудыг шалгахад хүүгийн дүрс огт бичигдээгүй байсан нь сэжигтний мэдүүлэг худал болохыг нотлох анхны сэжүүр болсон байна.
Киото мужийн цагдаагийн газраас 1000 орчим алба хаагчийг дайчлан өргөн цар хүрээтэй эрэн сурвалжлах ажиллагааг зохион байгуулжээ. Улмаар дөрөвдүгээр сарын 13-ны даваа гарагт хүүгийн сурдаг бага сургуулиас хоёр километр орчим зайд байрлах ой мод бүхий газраас цогцсыг нь олсон байна. Сэжигтэн эхний байцаалтаар цогцсыг нуун дарагдуулснаа хүлээн зөвшөөрч "Би үүнийг хийсэн нь эргэлзээгүй" хэмээн мэдүүлсэн бол мөрдөн байцаалтын явцад хүүг хөнөөсөн гэдгээ давхар хүлээжээ.
Шүүх эмнэлгийн урьдчилсан дүгнэлтээр талийгаач хүүг өнгөрсөн сарын сүүлээр нас барсан гэж тогтоосон байна. Гэхдээ цогцост ил харагдах гадны нөлөөтэй гэмтэл, шарх байхгүй байсан тул үхлийн нарийн шалтгааныг тодруулахаар нарийвчилсан шинжилгээ хийж байгаа аж. Хууль сахиулагчид дөрөвдүгээр сарын 15-нд сэжигтний гэрт нэгжлэг хийж, маргааш нь буюу 16-ны шөнө түүнийг албан ёсоор баривчлан хэргийг прокурорын байгууллагад шилжүүлжээ.
Одоогийн байдлаар мөрдөн байцаагчид сэжигтэн ямар сэдлээр, яг ямар аргаар хүүгийн аминд хүрсэн болохыг нарийвчлан тогтоохоор ажиллаж байна. Энэхүү ноцтой гэмт хэргийн шалтгаан нөхцөлийг бүрэн тодруулах нь цаашдын шүүхийн шатанд чухал ач холбогдолтой юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.