🔴Р.Батболд: Би М.Нарантуяа-Нара гишүүнийг зодоогүй

УИХ-ын гишүүн Р.Батболд сэтгүүлчдэд мэдээлэл хийж, намынхаа дотоод асуудал, саяхан зохион байгуулсан онц их хурал болон намын удирдлагатай холбоотой үүсээд буй маргааны талаар албан ёсны тайлбар өглөө. Тэрбээр Улс төрийн намын тухай хуулийн шинэчлэлтэй холбоотойгоор нам нь дөрвөн удаа дүрмийн өөрчлөлтөө бүртгүүлж чадаагүй тул идэвхгүй байдалд орж, улс төрийн үйл ажиллагаа явуулах боломжгүй болох эрсдэл үүссэн байсныг онцлов. Тиймээс анхан шатны гишүүдийн шаардлагаар намын эрх барих дээд байгууллага болох бүх гишүүдийн онц их хурлыг зохион байгуулсан бөгөөд энэ нь ямар нэгэн хууль, дүрэм зөрчөөгүй гэдгийг мэдэгдлээ.

УИХ-ын гишүүн Р.Батболд:

-Онц их хурлаас гарсан намын дүрмийн өөрчлөлт болон намын даргын асуудлыг шийдвэрлэсэн тогтоолыг дөрөвдүгээр сарын 9-ний өдөр Улсын Дээд шүүхэд хүргүүлсэн. Одоогийн байдлаар Дээд шүүх материалыг хүлээж авсан бөгөөд хяналтын шатанд явж байгаа. Мөн Үндэсний хороог заавал хуралдуулах шаардлагагүй байсан бөгөөд тус хороо нь намын дарга Батбаатарын ах дүү, найз нөхдөөс бүрдсэн тул тэдний шийдвэрийг хүлээх боломжгүй байсан.

Намайг Төсвийн болон Эдийн засгийн байнгын хорооноос гаргаж, өөр байнгын хороонд оруулах тухай албан бланк дээр миний зөвшөөрөлгүйгээр бичиж, бусад гишүүнээр гарын үсэг зуруулсан хуурамч үйлдэл гарлаа. Одоогийн харьяалагдаж буй хоёр байнгын хорооноос гарах бодолгүй байгаа. УИХ-ын даргын чиглэлийн дагуу гишүүд өөрийн хүсэлтээр байнгын хороонд орох ёстой.

Эрх баригч намын захиалгаар намаа хагалан бутаргаж байна гэх хардлага явж байна. Миний ард ямар нэгэн улс төрийн хүчин, захиалагч байхгүй. Хэрэв тийм хүн байгаа гэж үзэж байгаа бол хуулийн байгууллагад хандаж, нэрийг нь ил тод зарла.

Намын дотоод хагарал гэнэт үүсээгүй бөгөөд өнгөрсөн оноос эхлэлтэй. Намын удирдах түвшинд анхан шатны төлөөлөл байхгүй, зөвхөн нэг хүний хамаарал бүхий хүмүүсээр дүүрсэн гэх асуудлыг удаа дараа тавьж байсан. Дөрөвдүгээр сарын 26-нд зарласан намын их хурал нь төлөөллийн тэгш бус байдалтай буюу аймаг, дүүргээс ердөө хоёрхон хүн оролцуулахаар төлөвлөсөн нь шударга бус бөгөөд жинхэнэ намын их хурал болж чадахгүй гэж үзэж байгаа гэв