81 настай тэтгэврийн хөгшин TikTok сүлжээнд дэлхий дахиныг байлдан дагуулж байна
Их Британийн Норфолк гүнлэгийн Снеттишам тосгоны оршин суугч, 81 настай Иан Смит хэмээх тэтгэврийн хөгшин цахим сүлжээнд дэлхий дахины анхаарлыг татаж, сая сая хүний хайр хүндэтгэлийг хүлээгээд байна.
Тэрээр 50 гаруй жил шүдний эмчээр ажиллаад 2022 онд тэтгэвэртээ гарсан бөгөөд өөрийн бичсэн номоо сурталчлах зорилгоор TikTok платформд нэгдсэнээр ийнхүү гэнэтийн алдар нэрд хүрчээ.
Түүний цахим сүлжээн дэх аялал нэгэн сонирхолтой мөрийцлөөс эхтэй. Иан Смит тэтгэвэрт гарсныхаа дараа роман бичиж, гар бичмэлээ хэдэн зуун хэвлэлийн төлөөлөгч рүү илгээсэн ч ердөө гурван хүнээс л хариу авсан байна. Гэсэн хэдий ч тэрээр бууж өгөхийг хүссэнгүй, номоо бие даан хэвлүүлж, ном сонирхогчдын "BookTok" бүлгэмд нэгджээ. Энэ үед эхнэр нь түүнийг цахим сүлжээнд 100 дагагч ч цуглуулж чадахгүй хэмээн тоглоомоор хэлсэн нь түүний шарыг гозойлгож, өөрийгөө батлан харуулах хүсэл төрүүлсэн байна.
Өнгөрсөн 18 сарын хугацаанд тэрээр өдөрт хоёр удаа бичлэг тогтмол нийтэлж ирсэн бөгөөд зөвхөн номоо сурталчлаад зогсохгүй 80 гаруй жилийн амьдралын туршлага, урам зориг, эерэг хандлагыг бусадтай хуваалцдаг. Үүний үр дүнд түүний дагагчдын тоо 1.5 саяд хүрч, хамгийн их хандалт авсан бичлэг нь 59 сая гаруй удаа үзжээ.
Хамгийн сонирхолтой нь түүний үнэнч шүтэн бишрэгчдийн дийлэнх хувийг 20 гаруй насны залуучууд эзэлдэг бөгөөд пүрэв гаргийн орой бүр хийдэг шууд дамжуулалтыг нь Бразил зэрэг дэлхийн өнцөг булан бүрээс хүмүүс орж үздэг байна.
Иан Смит "BBC Look East" сувагт өгсөн ярилцлагадаа энэ үйл явдлыг маш гайхалтай бөгөөд даруу байхыг сануулсан туршлага болсон хэмээн онцолжээ. Наян нэгэн настай өвгөн алганд багтах гар утас руу ярьж байгаа нь дэлхий даяар ийм том цуурайтаж, сая сая хүнд хүрч байгаад тэрээр өөрөө ч итгэж ядан байгаагаа илэрхийлсэн юм.
Түүнчлэн өнгөрсөн жил хагасын хугацаанд цахим сүлжээнээс ямар ч сөрөг сэтгэгдэл, хандлага мэдрээгүй бөгөөд интернэт хэрэглэгчдийн найрсаг, эелдэг байдал түүнийг хамгийн ихээр гайхшруулсан байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.