Япон улс зэвсгийн экспортын хоригоо бүрэн цуцалж түүхэн шийдвэр гаргав
Япон улсын Засгийн газар болон Үндэсний аюулгүй байдлын зөвлөл хамтран хуралдаж, батлан хамгаалах тоног төхөөрөмж, технологи шилжүүлэх гурван зарчимд нэмэлт өөрчлөлт оруулах замаар зэвсгийн экспортын хоригийг бүрэн цуцалсан түүхэн шийдвэрийг баталлаа. Ерөнхий сайд Санаэ Такаичигийн засаг захиргаанаас гаргасан энэхүү шийдвэр нь бүс нутгийн аюулгүй байдлын орчин хурцадмал байгаа өнөө үед холбоотон орнуудтай хамтын ажиллагаагаа гүнзгийрүүлэх, дотоодын батлан хамгаалах аж үйлдвэрээ бэхжүүлэх зорилготой юм.
Өмнө нь тус улсын зэвсгийн экспорт зөвхөн аврах ажиллагаа, тээвэрлэлт, анхааруулах, хяналт шалгалт болон мина устгах гэсэн үхлийн бус таван төрлөөр хатуу хязгаарлагдаж байв. Харин шинэ журам хэрэгжиж эхэлснээр Япон, Их Британи, Итали улсуудын хамтран хөгжүүлж буй зургадугаар үеийн сөнөөгч онгоц, Австралид нийлүүлэхээр тохиролцсон "Mogami" ангиллын фрегат хөлөг онгоц, түүнчлэн пуужингийн систем, танк, байлдааны дронуудыг гадаад зах зээлд нийлүүлэх бүрэн боломж нээгдэж байна.
Шинэчилсэн журмын дагуу АНУ, Их Британи, Австрали болон Зүүн өмнөд Азийн орнууд зэрэг батлан хамгаалахын тоног төхөөрөмж шилжүүлэх гэрээ байгуулсан 17 улсад цэргийн техник нийлүүлэх эрх зүйн орчин бүрджээ. Экспортын гэрээ бүрийг Үндэсний аюулгүй байдлын зөвлөл тухай бүрт нь нарийвчлан хянах бөгөөд хүлээн авагч тал зэвсэглэлийг зөвхөн НҮБ-ын дүрмийн дагуу ашиглах хатуу үүрэг хүлээнэ. Хэдийгээр идэвхтэй дайн байлдаантай бүс нутагт зэвсэг нийлүүлэхийг хориглосон хэвээр байгаа ч үндэсний аюулгүй байдлын тусгай нөхцөл байдал үүссэн үед үл хамаарах заалт үйлчлэхээр тусгагдсан байна.
Энэхүү стратегийн өөрчлөлт нь Хятад болон Хойд Солонгосын зүгээс ирж буй цэргийн аюул заналхийлэл нэмэгдэж байгаатай шууд холбоотой юм. Ерөнхий сайд Санаэ Такаичи уг шийдвэрийг тайлбарлахдаа өнөөгийн аюулгүй байдлын ээдрээтэй орчинд ямар ч улс орон ганцаараа өөрийн амар амгалан байдлыг бие даан хамгаалж чадахгүй гэдгийг онцлон тэмдэглэжээ.
Японы Засгийн газрын энэхүү алхмыг АНУ, Австрали зэрэг гол холбоотнууд нь бүс нутгийн тогтвортой байдалд чухал хувь нэмэр оруулах түүхэн үйл явдал хэмээн өндрөөр үнэлж байна. Нөгөөтэйгүүр, Хятад улсын Гадаад хэргийн яам үүнийг шинэ милитаризм руу чиглэсэн аюултай алхам гэж хатуу шүүмжилсэн бол Японы дотоодод энх тайванч Үндсэн хуулийн зарчмаас ухарлаа хэмээн үзсэн иргэдийн эсэргүүцлийн жагсаал өрнөж эхэллээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.