Сөнөөгч онгоцны нисгэгчид гар утсаараа зураг авах үеэрээ мөргөлджээ
Өмнөд Солонгосын Тэгү хотын ойролцоо хоёр F-15K сөнөөгч онгоц агаарт мөргөлдсөн хэрэг нь нисгэгчид хувийн гар утсаараа дурсгалын зураг, бичлэг хийж анхаарлаа сарниулснаас үүдэлтэй болохыг Сөүлийн Аудит, хяналтын шалгалтын хорооноос гаргасан шинэ тайланд дурджээ.
Уг осол нь нисгэгчдийн дунд түгээмэл байсан буруу дадал зуршлаас шалтгаалсан тул нисэх хүчин болон нисгэгчдийн аль аль нь буруутай гэж үзсэн байна.
Уг осол нь 2021 оны арванхоёрдугаар сард ээлжит сургуулилтын нислэгийн үеэр гарсан байна. Туслах нисгэгч өөр анги руу шилжихээсээ өмнө сүүлчийн нислэгээ үйлдэж байсан бөгөөд нислэгийн өмнөх зааварчилгааны үеэр дурсгалын зураг авах хүсэлтэй байгаагаа илэрхийлжээ. Ингээд бааз руугаа буцах замдаа тэрээр хувийн гар утсаараа зураг дарж эхэлсэн байна.
Туслах нисгэгч зураг авч байгааг харсан ахлах нисгэгч өөрийн онгоцонд байсан өөр нэг багийн гишүүнд түүний бичлэгийг хийхийг даалгажээ. Энэ үед туслах нисгэгч камерын өнцгөө сайжруулахын тулд гэнэт өндрөө авч, онгоцоо эргүүлэх огцом үйлдэл хийсэн байна. Ахлах нисгэгч мөргөлдөхөөс зайлсхийж хурдтай доошилсон боловч хоёр F-15K онгоц агаарт шүргэлцэж, нэгнийх нь зүүн далавч, нөгөөгийнх нь сүүлний тогтворжуулагч ноцтой гэмтжээ.
Агаарт хүчтэй мөргөлдсөн хэдий ч хоёр онгоц бааздаа эсэн мэнд газардаж чадсан бөгөөд нисгэгчид бэртэж гэмтээгүй байна. Гэвч Өмнөд Солонгосын зэвсэгт хүчинд 880 сая вон буюу ойролцоогоор 596 мянган ам.долларын хохирол учирчээ. Нисэх хүчний удирдлагууд туслах нисгэгчид дотоод сахилгын шийтгэл ногдуулж, албан үүргийг нь түдгэлзүүлэн, засварын төлбөрийг бүрэн төлөхийг шаардсан байна. Уг нисгэгч хожим нь цэргийн албанаас гарч, одоо арилжааны агаарын тээврийн компанид ажиллаж байгаа аж.
Торгуулийн хэмжээг эсэргүүцсэн нисгэгч ахлах нисгэгчийг энэхүү үйлдэлд чимээгүй зөвшөөрөл өгсөн хэмээн давж заалджээ.
Сөүлийн Аудит, хяналтын шалгалтын хороо 2026 оны дөрөвдүгээр сарын 22-нд гаргасан эцсийн тайландаа түүний талд шийдвэр гаргаж, торгуулийн хэмжээг 90 хувиар бууруулан 88 сая вон буюу 59,600 ам.доллар болгож хөнгөлсөн байна.
Аудитын хорооноос нислэгийн үед гар утас ашиглах, бичлэг хийхийг хориглосон хатуу дүрмийг хэрэгжүүлээгүй тул нисэх хүчин ослын хариуцлагыг хэсэгчлэн хүлээх ёстой гэж дүгнэжээ.
Тухайн үед цэргийн нисгэгчдийн дунд нислэг үйлдэхдээ зураг авах нь түгээмэл соёл байсныг тайланд хүлээн зөвшөөрсөн байна. Түүнчлэн нисгэгчийн өмнө нь гаргаж байсан амжилт болон гэмтэлтэй сөнөөгч онгоцыг чадварлагаар жолоодон эсэн мэнд газардаж, онгоцыг бүрэн сүйрлээс аварсан зэргийг харгалзан үзэж торгуулийг ийнхүү бууруулжээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.