🔴Т.Даваадалай: Бохир улс төржилтөөр гэр бүл рүү ордог техникээ болимоор байна

Нийслэлийн Засаг даргын нэгдүгээр орлогч Т.Даваадалай цаг үеийн асуудлаар албан ёсны мэдээлэл хийлээ. Тэрбээр энэ үеэр нийслэл хотод өрнөж буй бүтээн байгуулалт, цаашид хэрэгжүүлэх төсөл хөтөлбөрүүд болон хотын захиргаанаас баримталж буй бодлого, шийдвэрийн талаарх дэлгэрэнгүй мэдээллийг олон нийтэд танилцуулсан юм.

Нийслэлийн Засаг даргын нэгдүгээр орлогч Т.Даваадалай:

-Манай гэр бүлийн хүний хувьд холбогдсон асуудал байхгүй. Гэр бүлийн нарийн асуудлаа яримааргүй байна. Нэр хүндээ сэргээлгэхээр холбогдох байгууллагад хандсан байгаа. Бохир улс төр хийж гэр бүл, хүүхэд рүү ордог техникээ болих хэрэгтэй. Хувь хүн рүү бол дайрч болно. Энэ бол асуудалгүй. 

Сэлбэ 20 минутын хотын хувьд хүндээ ээлтэй хот болох үүднээс хамгийн анхны удаа хот барих гэж байгаа асуудал. Хот төлөвлөлтийг хот буюу нутгийн захиргааны байгууллага хийхээс биш хувийн байгууллагууд хийхгүй. Төр хүндээ ээлтэй хот бий болгох гэж явдаг. Хувийн хэвшлийн компаниуд ашгийн төлөө явдаг. 

Монголдоо анх удаа таван шатлал бүхий нуурын төсөл, 50 га газар ногоон байгууламжтай, хүүхдэд ээлтэй хотыг бүтээх гэж байна. Энэ хотыг байгуулах гээд газар чөлөөлөлт хийгээд явж байх үед агаарын бохирдол долоон хувь буурсан. Мөн дагаад нүхэн жорлон байхгүй болж байгаа. Бид сайхан хотод амьдрах цаг нь болсон. Тийм учраас төр ажлаа хийгээд явж байна.  НИТХ-ын төлөөлөгч Сэргэлэнбаатартай холбоотой мэдээлэл надад одоогоор байхгүй байна. Албан байдлаар гишүүнд хариу өгөхөөр болсон.

Хэрвээ Сэлбэ төсөл гацахгүй үргэлжилбэл 2027 оны долоодугаар сараас эхлээд эхний орон сууцууд ашиглалтад орно. Мөн хоёр сургууль ашиглалтад орно. Бид Улаанбаатар хотын авто замын түгжрэлийг бууруулах, гэр хорооллыг орон сууцжуулах хуулиар сонгон шалгаруулалт хийж байгаа. Хувийн хэвшлүүд өөрсдөө төсвөө гаргаад сонгон шалгаруулалтад оролцож байгаа. Өчигдөр төслийн ТУЗ хуралдаж үйлчилгээний төвүүд хувийн хэвшлүүд өөрсдөө барилга байгууламжаа бариад үйлчилгээний төвөө нээх зөвшөөрлийг өгсөн.  Одоогоор төслийн нийт гүйцэтгэл 22.63 хувийн гүйцэтгэлтэй явж байна. 

Туулын хурдны замын төслийн талаар Ерөнхий сайд албан байдлаар үүрэг өгсөн. Үүрэг өгсний дагуу ажлыг зогсоосон байна.  Нийслэл 2027 онд 300 тэрбум төгрөгийн үнэт цаас гаргахаар төлөвлөж байна. Үүний 250 тэрбум төгрөгийг ДЦС-5 хөрөнгө оруулалтад төлөвлөж байна. Өнгөрсөн долоо хоногт талбайн үнс зайлуулах ажил эхэлсэн. Энэ төсөл төр, хувийн түншлэлийн хэлбэрээр буюу төр 20 хувийг хөрөнгө оруулах хэлбэрээр хэрэгжиж байгаа. Нийслэл 20 хувийн хөрөнгө оруулалтад 200 тэрбум төгрөгийн бонд босгосон.