АНУ-ын Оклахома мужид хүчтэй хар салхи дэгдэж онц байдал зарлажээ
АНУ-ын Оклахома мужийн Энид хотыг цагт 280 гаруй километрийн хурдтай хүчтэй хар салхи дайрч, их хэмжээний хохирол учруулсан ч хүний амь нас эрсдээгүй байна. Үндэсний цаг уурын албанаас уг байгалийн гамшгийг 1991 оноос хойш тус бүс нутагт тохиолдсон анхны EF-4 зэрэглэлийн хар салхи хэмээн урьдчилсан байдлаар тогтоогоод байна.
Байгалийн гамшиг орон нутгийн цагаар оройн 20:11-ээс 20:48 цагийн хооронд хагас цаг гаруй хугацаанд үргэлжилжээ. Салхины хурд 274-282 км/ц хүрч, 450 гаруй метр өргөн талбайг хамарсан байна. Гамшигт Оклахома мужийн хойд хэсэгт орших Энид хот болон Гарфилд гүнлэг, тэр дундаа Грэй Риж суурьшлын бүс хамгийн ихээр өртсөн байна.
Хүчтэй шуурганы улмаас Энид хотод хамгийн багадаа 40 гаруй орон сууц эвдэрч сүйдсэний зэрэгцээ зарим барилга сууриараа бүрэн нуржээ. Мөн хотын өмнөд хэсэгт байрлах худалдааны төвүүд, мод боловсруулах цех сүйрсэн байна. Ванс агаарын цэргийн баазын цахилгаан, усны шугам тасарснаар үйл ажиллагааг нь тодорхойгүй хугацаагаар зогсоосон ч ажилтнууд бүгд эсэн мэнд олдсон юм. Орон нутгийн гал түймэр, цагдаагийн алба хаагчдын шуурхай аврах ажиллагааны үр дүнд ердөө 10-15 хүн хөнгөн гэмтэж эмнэлгийн тусламж авсан бөгөөд амь үрэгдсэн хүн бүртгэгдээгүй байна.
Дэд бүтцийн хувьд ноцтой хохирол амсаж, Гарфилд гүнлэгт 2600 орчим өрх цахилгаангүй болж, 81-р хурдны зам зэрэг гол замууд нурсан хог хаягдалд дарагдан хаагджээ. Нөхцөл байдалтай холбогдуулан Оклахома мужийн амбан захирагч Кевин Ститт Гарфилд болон Кэй гүнлэгүүдэд 30 хоногийн хугацаатай гамшгийн байдал зарлах тушаалд гарын үсэг зурсан байна. Одоогийн байдлаар хөрш Канзас мужаас сайн дурын ажилтнууд хүрэлцэн ирж, нуранги цэвэрлэх, сэргээн босгох ажилд туслалцаа үзүүлж эхэлжээ.
Сэргээн босголтын ажил эрчимтэй явагдаж байгаа хэдий ч аюул бүрэн арилаагүй байна. Цаг уурын байгууллагаас Оклахомагийн төв болон зүүн өмнөд хэсгээр дахин хүчтэй шуурга дэгдэх, мөндөр орох, шинээр хар салхи үүсэх эрсдэл дунд зэрэг байгааг иргэдэд хатуу анхаарууллаа. Тиймээс оршин суугчдыг сонор сэрэмжтэй байж, албаны хүмүүсийн заавар зөвлөмжийг дагахыг уриалж байна.
Эх сурвалж:
• krdo.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.