🔴Ж.Ганбаатар: Иргэн баян байж төр баян байна гэдэг зарчмыг ойлгох цаг болсон

Төсвийн байнгын хороо, Эдийн засгийн байнгын хорооны хамтарсан хуралдаанаар төсвийн хүрээний мэдэгдлийг хэлэлцэж буй энэ үед Эдийн засгийн хөгжлийн яам тоо баримтаа үнэн зөв, бодитой нэгтгэх шаардлагатай байгааг УИХ-ын гишүүн Ж.Ганбаатар хэлэв. 

УИХ-ын гишүүн Ж.Ганбаатар:

-Хэрэглээний үнийн индекс буюу инфляцын түвшин олон жилийн турш 5-7 хувьтай гарч ирсэн ч бодит амьдрал дээр иргэдийн худалдан авах чадвар эрс унасан. Энэ нь тоо баримт буруу нэгтгэгдэж байгаагийн илрэл бөгөөд Эдийн засгийн хөгжлийн яам зөвхөн Статистикийн ерөнхий газрын гаргасан тоонд найдах бус, өөрсдөө бодит тооцоолол хийж, үнийн өсөлтөөс урьдчилан сэргийлэх бодлого боловсруулах шаардлагатай.

Улс орны эдийн засгийн өсөлт, нүүрс болон зэсийн үнийн өсөлт зөвхөн томоохон төслүүд дээр яригдаж, жирийн иргэдийн амьдралд наалдахгүй байгаа. Сүүлийн 3-4 жилд төр хэт их ачааллыг өөртөө төвлөрүүлж, бизнес эрхлэгчид болон иргэд рүүгээ чиглэсэн бодлого орхигдсоны улмаас ядуурал нэмэгдэж, худалдан авалт эрс буурсан байна.

Үүний нэг тод жишээ нь иргэдийн хэрэглээний зээлийн эргэн төлөлт 40 орчим хувиар буурсан явдал бөгөөд энэ нь иргэд хариуцлагагүйдээ бус, үнэхээр төлбөрийн чадамжгүй болсныг илтгэж байна.

"Төр баян болсноор иргэн баян болдоггүй" бөгөөд харин "иргэн баян байж төр баян байна" гэдэг зарчмыг ойлгох цаг болсон гэлээ.