Сваровски гэр бүлийн хувийн арлаа 24 сая еврогоор худалдаана

Алдарт Сваровски (Swarovski) гэр бүлийн итгэмжлэгдсэн сангаас Венецийн нууранд байрлах "Изола Санта Кристина" (Isola Santa Cristina) хэмээх тансаг зэрэглэлийн хувийн арлыг 24 сая евро буюу ойролцоогоор 28-28.3 сая ам.доллароор худалдахаар болсноо зарлалаа. Энэхүү онцгой үл хөдлөх хөрөнгө нь сүүлийн 40 орчим жилийн хугацаанд анх удаа нээлттэй зах зээлд борлуулагдах гэж буйгаараа онцлог юм.

Тус арлыг анх 1986 онд болор эдлэлийн компанийг үүсгэн байгуулагч Даниел Сваровскийн гуч хүү болох Гернот Лангес-Сваровски худалдан авч байжээ. Байгаль орчинд ээлтэй байдлыг эрхэмлэгч тэрээр арлыг зөвхөн амралтын газар бус, хувийн эко төсөл болгон хөгжүүлсэн байна. Гернот 2021 онд 77 насандаа таалал төгссөний дараа эзэмшил эрх нь гэр бүлийн "SEGNAL Privatstiftung" хувийн санд шилжсэн бөгөөд одоогоор түүний дагавар хүү Рене Дойч болон эхнэр Сандра нар арлын менежмент, сэргээн засварлалтын ажлыг хариуцан ажиллаж байна.

Венецийн нуурын хойд хэсэгт байрлах энэхүү арал нь хотын төвөөс завиар 15-20 минут яваад хүрэх зайд оршдог хэдий ч маш нам гүм, тусгаарлагдсан орчныг бүрдүүлсэн байдаг.

Нийт 72 акр талбайг хамарсан уг эдлэнгийн төв хэсэгт ягаан өнгийн гаднах өнгө үзэмжтэй, байгалийн гэрэлтүүлэг сайтай "Вилла Аммьяна" (Villa Ammiana) хэмээх харш сүндэрлэнэ. Уг харш нь 16 зочин хүлээн авах хүчин чадалтай 9 унтлагын өрөө, орчин үеийн тоноглол бүхий гал тогоо, нуурыг бүхэлд нь тольдох боломжтой дээврийн террастайгаас гадна усан бассейн, иог болон бясалгалын өрөө, хувийн завины зогсоол, нисдэг тэрэгний талбай зэрэг тансаг зэрэглэлийн бүхий л үйлчилгээг багтаажээ.

Тансаг зэрэглэлийн амралтын газраас гадна тус арал нь хөдөө аж ахуйн идэвхтэй үйл ажиллагаа явуулдаг бүс юм.

Энд органик ногооны талбай, усан үзмийн төгөл, чавга, чангаанз, инжир жимсний цэцэрлэгүүд байхаас гадна зөгийн аж ахуй эрхэлж, онцгой төрлийн дарс үйлдвэрлэдэг. Мөн кипарис болон чидун жимсний модоор хүрээлэгдсэн тайван орчинд зэрлэг тогос, гургуул зэрэг амьтад чөлөөтэй амьдардаг байна.

Талийгаач эзнийхээ алсын харааг үргэлжлүүлэн, гэр бүлийнхэн нь Венецийн Ка Фоскари (Ca' Foscari) их сургуультай хамтран уугуул загасны аж ахуйг сэргээн хөгжүүлж байна. Одоогоор усны менежмент, хөдөө аж ахуй болон техникийн үйлчилгээг дэмжих шинэ технологийн төв зэрэг дэд бүтцийн шинэчлэлд 2 сая гаруй ам.долларын хөрөнгө оруулалт хийгээд байгаа аж.

Энэхүү ховор бөгөөд үнэ цэнтэй үл хөдлөх хөрөнгийн борлуулалтыг олон улсад танигдсан "Venice Sotheby's International Realty" компани хариуцан, өндөр хөрөнгөтэй худалдан авагчдад санал болгож эхэллээ.