Оросын цэргийн хүчний давуу тал суларч цэрэг татлага буурчээ
Олон улсын шинжээчдийн дүгнэлтээр ОХУ-ын Украины эсрэг дайнд үзүүлж байсан хүн хүчний давуу тал суларч эхэлсэн байна. Москвагийн зүгээс санхүүгийн асар их урамшуулал амлаж байгаа хэдий ч сайн дурын цэрэг элсүүлэлт буурч, эдийн засгийн хүндрэл гүнзгийрсний улмаас фронт дээрх хохирлоо нөхөхөд улам хүнд болжээ.
Германы Олон улс, аюулгүй байдлын хүрээлэнгийн эдийн засгийн шинжээч Янис Клюгийн тооцоолсноор, 2026 оны эхний улиралд Оросын зэвсэгт хүчинд элссэн цэргүүдийн тоо өмнөх оны мөн үетэй харьцуулахад 20 хувиар буурсан байна.
Тодруулбал, ОХУ 2025 оны эхний улиралд 89,601 цэрэг элсүүлж байсан бол 2026 оны эхний улиралд энэ тоо 71,216 болж цөөрчээ. Кремлийн зүгээс сайн дурынхныг татахын тулд 80,000 ам.доллар хүртэлх гэрээ байгуулсны урамшуулал болон 140,000 ам.доллар буюу 10 сая рублийн өр тэглэх зэрэг урьд өмнө байгаагүй санхүүгийн амлалт өгч байгаа ч зорилтот хэмжээндээ хүрч чадахгүй байна. Стратегийн судалгааны олон улсын хүрээлэнгийн (IISS) ахлах ажилтан үүнийг Оросын түүхэнд иргэдийг албадан бус, мөнгөөр урамшуулан дайчилж буй анхны тохиолдол гэдгийг тэмдэглээд, "рубль тулалддаггүй" хэмээн тодотгожээ.
Барууны тагнуулын мэдээллээр, дайн эхэлснээс хойш Оросын талын нийт хохирол (амь үрэгдсэн болон шархадсан) 500,000-д хүрээд байна. Одоогийн байдлаар ОХУ сар бүр 30,000-аас 35,000 цэргээ фронтод алдаж байгаа нь шинээр элсүүлж буй цэргүүдийн тооноос давжээ. Нөгөө талд, Украин улс тактикийн дроны давуу тал болон дунд зайн цохилтын тактикийг амжилттай ашиглаж байна.
Тухайлбал, Крым рүү чиглэсэн ложистикийн гол зам болох М-14 хурдны замыг хааснаар Оросын хүн хүчний давуу талыг саармагжуулж чаджээ. Украины Зэвсэгт хүчний ерөнхий командлагч Александр Сырскийн баталснаар, 2026 оны тавдугаар сард Украины дроны ангиуд Оросын шинээр элсүүлсэн цэргүүдээс илүү олон тооны бие бүрэлдэхүүнийг жагсаалаас гаргасан байна.
Цэргийн насны олон зуун мянган залуус фронт руу явж, эсвэл эх орноосоо дүрвэсэн нь Оросын иргэний эдийн засагт түүхэн дэх хамгийн хүнд хөдөлмөрийн хүчний хомстолыг үүсгээд байгаа аж. Оросын батлан хамгаалах салбар өдөр шөнөгүй ажиллаж байгаа ч иргэний салбартай ажиллах хүчний хувьд өрсөлдөхөд хүндрэлтэй болж, цэргийн үйлдвэрлэлийг цаашид нэмэгдүүлэх боломж хязгаарлагдсан гэв.
Түүнчлэн Янис Клюгийн тооцоолсноор, 2026 оны эхний улиралд Оросын холбооны төсвийн орлогын 65.26 хувь буюу бараг гуравны хоёрыг цэргийн зардалд зарцуулсан нь өмнөх оныхоос 30 хувиар өссөн үзүүлэлт юм.
Оросын эрх баригчид олон нийтийн эсэргүүцлээс зайлсхийхийн тулд хоригдлуудыг фронт руу илгээх, БНАСАУ-ын цэргүүдийг гурван үе шаттайгаар татан оролцуулах, гадаадын цагаачдыг элсүүлэх зэрэг далд дайчилгааны аргуудыг ашиглаж байсан ч эдгээр нөөц одоо шавхагдаж байгаа аж.
Шинжээчдийн үзэж буйгаар Ерөнхийлөгч Владимир Путин улс төрийн мухардалд орсон бөгөөд дайныг үргэлжлүүлэхийн тулд олон нийтийн дургүйцлийг төрүүлэх албадан дайчилгааны хоёр дахь давалгааг зарлаж, цэргийн насны залуусыг хилээр гарахыг хориглохоос өөр аргагүй болох эрсдэлтэй аж.
Стратеги болон олон улсын судалгааны төвийн (CSIS) шинжээч Макс Бергманны тэмдэглэснээр, 2026 оны есдүгээр сард болох Төрийн Думын сонгууль дөхөж буй энэ үед албадан дайчилгаа явуулах нь Путины дэглэмийн хувьд улс төрийн асар том эрсдэлтэй алхам болох юм.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.