Нью-Йорк Никс багийн ялалтын баяр эмх замбараагүй байдал болон хувирчээ
Нью-Йорк Никс баг Үндэсний сагсан бөмбөгийн холбооны (NBA) шувтаргын тоглолтод Сан-Антонио Спөрс багийг 94:90 харьцаагаар хожиж, 53 жилийн дараа анх удаа аваргалсны дараа Манхэттэн дүүрэгт олныг хамарсан эмх замбараагүй байдал үүсчээ.
Бямба гаргийн орой Техас мужид болсон цувралын тав дахь тоглолтод ялалт байгуулсны дараа хэдэн арван мянган хөгжөөн дэмжигч Мэдисон Скуэр гарден болон Таймс Скуэр орчмын гудамжуудыг бүрхсэн байна. Гэвч баярын уур амьсгал удалгүй хяналтаас гарч, ням гаргийн үүрээр хүчирхийлэл, сүйтгэл болон хувирчээ.
Баярын жагсаал эмх замбараагүй байдал болон хувирах үеэр ноцтой хэргүүд гарсан байна.
Үүрийн 02:00 цагийн орчимд Бродвей болон 42-р гудамжны уулзварын ойролцоо 17 настай хүү хөлөндөө буудуулжээ. Тухайн үед цугларсан олон хүн зам хааж байсны улмаас түргэн тусламжийн машин хэргийн газарт хүрч чадаагүй тул цагдаагийн машинаар шархадсан хүүг эмнэлэгт хүргэсэн байна. Цагдаагийнхан хэргийн газраас зэвсэг хураан авч, уг хэрэгт холбогдуулан гурван хүнийг саатуулжээ. Үүнээс гадна дөрвөн хүн хутгалуулж, эмх замбараагүй байдлыг намжаахаар ажиллаж байсан цагдаагийн арван алба хаагч бэртсэн бөгөөд тэдний нэг нь нүүрэндээ цохиулж, өөр нэг нь шилэн лонхонд цохиулсан байна.
Эмх замбараагүй байдлын үеэр хотын дэд бүтэц болон хувийн өмчид их хэмжээний хохирол учирчээ.
Тэр дундаа Бразил, Мароккогийн хөлбөмбөгийн шигшээ багуудын тоглолтын дараа хөгжөөн дэмжигчдийг тээвэрлэж байсан сургуулийн таван шар автобусыг үймээн дэгдээгчид эвдэн сүйтгэж, галдан шатаасан байна. Түүнчлэн Нью-Йорк хотын цагдаагийн газрын эргүүлийн таван машин халдлагад өртсөн бөгөөд хүмүүс машин дээр гарч үсрэх, цонхыг нь цохих зэргээр сүйтгэжээ. Олон нийт барилгын шат, хөшөө баримал болон хөдөлгөөнд оролцож байсан галын машин руу авирч байсан нь нөхцөл байдлыг улам хүндрүүлсэн байна.
Нью-Йорк хотын цагдаагийн газраас мэдээлснээр, шөнийн үймээний үеэр нийт 63 хүнийг баривчилжээ.
Тэдэнд цагдаагийн алба хаагчийн биед халдсан, хууль бусаар зэвсэг эзэмшсэн, эд хөрөнгө сүйтгэсэн болон олон нийтийн амгалан тайван байдлыг алдагдуулсан гэх үндэслэлээр эрүүгийн хэрэг үүсгэсэн байна. Тоглолтын дараа Нью-Йорк Никс багийн эзэн Жеймс Долан хэвлэлийн бага хурлыг тасалдуулан байж хөгжөөн дэмжигчдэдээ хандан тайван байхыг уриалжээ. Тэрээр хотын оршин суугчдыг баяраа тэмдэглэхдээ аюулгүй байдлаа хангаж, бусдад хохирол учруулахгүй байхыг хүссэн байна.
Гэсэн хэдий ч Нью-Йорк хотын захирагч Зоран Мамданигийн ажлын албанаас түүхэн ялалтыг тэмдэглэх албан ёсны баярын парад болон хүндэтгэлийн ажиллагааг төлөвлөсөн хугацаанд буюу пүрэв гарагт хотын захиргааны байрны гадна зохион байгуулахаар шийдвэрлэснийг мэдэгдлээ. Хотын удирдлагууд парадын үеэр аюулгүй байдлыг дээд зэргээр хангахаа амлажээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.