“Michael” киноны амжилт Жексоны дуунуудыг дахин чартын оргилд хүргэжээ
Поп урлагийн хаан Майкл Жексоны амьдрал, уран бүтээлийг өгүүлсэн "Michael" намтарчилсан кино нээлтээ хийснээс хойш найман долоо хоногийн хугацаанд 932-937 сая ам.долларын орлого олж, хөгжмийн намтар төрлийн киноны шинэ дээд амжилтыг тогтоолоо.
Найруулагч Антуан Фукуагийн бүтээл өмнө нь 911.9 сая ам.долларын орлогоор рекорд эзэмшиж байсан киног ардаа орхиж, энэ төрлийн хамгийн ашиг орлоготой кино болсон байна. Мөн 2026 онд нэг тэрбум ам.долларын босгыг давах магадлалтай бүтээлүүдийн нэгээр нэрлэгдэж байна.
Нийт орлогын 362.7 сая ам.доллар буюу 38.9 хувийг Хойд Америкийн зах зээлээс, харин 569.4 сая ам.доллар буюу 61.1 хувийг олон улсын зах зээлээс бүрдүүлжээ. Олон улсын орлогоор Их Британи тэргүүлж, Франц, Герман, Бразил, Австрали улс удаалсан байна. Түүнчлэн Япон дахь нээлт нь намтар киноны төрөлдөө түүхэн дэх хамгийн өндөр орлоготой эхлэлүүдийн нэг болжээ.
155-200 сая ам.долларын төсөвтэй энэхүү кино нь 1960-аад оны "Jackson 5" хамтлагийн үеэс эхлэн Майкл Жексоны "Bad World Tour" аялан тоглолт хүртэлх амьдралын замналыг харуулдаг. Хэдийгээр шүүмжлэгчдээс дунд зэрэг үнэлгээ авсан ч үзэгчдийн өндөр дэмжлэгийг хүлээсээр байна. Киноны амжилтын нөлөөгөөр Майкл Жексоны дуунуудын сонсолт стриминг платформууд дээр эрс өсөж, "Thriller", "Off the Wall" зэрэг сонгодог цомгууд хөгжмийн чартад дахин багтжээ. Мөн киноны орлогыг нэмэгдүүлэх зорилгоор Lionsgate компани уг бүтээлийг зургаадугаар сарын 9-нөөс эхлэн дижитал стриминг платформуудад байршуулсан байна.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.