Москвагийн газрын тос боловсруулах үйлдвэр дроны довтолгоонд өртжээ
Украин улс дөрөв гаруй жилийн өмнө эхэлсэн дайн дэгдсэнээс хойших хамгийн том дроны довтолгоог Москва хотын эсрэг хийж, Капотня дүүрэгт байрлах Москвагийн газрын тос боловсруулах үйлдвэрийг (МНПЗ) нэг долоо хоногийн дотор хоёр дахь удаагаа оносон байна.
Оросын албаны эх сурвалжуудын мэдээлснээр, тус улсын агаарын хамгаалалт нийт 555 орчим украин дроныг устгаснаас 180-200 орчим нь зөвхөн Москва болон түүний орчмын бүс нутгийг чиглэжээ. Халдлагын улмаас Москва мужид 16 хүн бэртэж гэмтэн, газрын тосны үйлдвэрт томоохон хэмжээний гал түймэр дэгдсэн байна.
Газпром Нефть компанийн удирддаг тус үйлдвэр нь Кремлиэс 15 километрийн зайд оршдог бөгөөд Москва хотын шатахууны 40 хувь, дизель түлшний 50 хувийг дангаараа хангадаг стратегийн чухал ач холбогдолтой объект юм. Хэд хэдэн дрон агаарын хамгаалалтын системийг нэвтэрч, түүхий тос боловсруулах хэсэг болон хадгалах савнуудыг оножээ. Олон нийтийн сүлжээгээр цацагдсан дүрс бичлэгээс харахад үйлдвэрийн нутаг дэвсгэрт дөрвөн том гал түймрийн голомт үүссэн байна.
Агаарын довтолгооны улмаас Москвагийн иргэний дэд бүтэц болон нисэх буудлуудын үйл ажиллагаа бүрэн саатлаа. Нийслэлийн хамгийн ачаалалтай Шереметьево, Внуково, Жуковский нисэх буудлууд нислэгээ бүрэн зогсоож, Шереметьево буудлын зорчигчдыг аюулгүй газарт нүүлгэн шилжүүлсэн байна. Аэрофлот болон Россия агаарын тээврийн компаниуд 170 гаруй нислэгээ цуцалжээ. Мөн дроны хэлтэрхийнүүд Москвагийн зүүн өмнөд хэсэгт орших Садовод худалдааны төвийг гэмтээж, Жуковский дүүргийн орон сууцны барилгыг мөргөж гал түймэр гаргасан байна. Үүнээс гадна Ростов мужийн Гуково хот болон Украины түр эзлэгдсэн газар нутаг дахь хэд хэдэн байгууламж дроны цохилтод өртжээ.
Украины Ерөнхийлөгч Володимир Зеленський уг ажиллагааг баталж, энэ бол Киевийн 1000 жилийн түүхтэй Киево-Печерская Лавра хийд зэрэг Украины хотуудад Оросын хийсэн пуужингийн цохилтын эсрэг 'шударга хариу арга хэмжээ' гэж мэдэгдэв. Тэрээр дайныг зогсоох цаг болсныг тэмдэглээд, Орос улс дипломат харилцааны чиглэлд шаардлагатай алхмуудыг хийх ёстойг уриаллаа. Зеленський Украины зүгээс авч хэрэгжүүлж буй 'алсын зайн хориг арга хэмжээ' буюу дроны цохилтууд нь Оросын ард түмэнд дайны үр дагаврыг мэдрүүлж, Кремлийг хэлэлцээрийн ширээний ард суулгахад чухал нөлөө үзүүлнэ гэж үзэж байна.
Халдлага болох үеэр ОХУ-ын Ерөнхийлөгч Владимир Путин Москвагаас зүүн зүгт 700 орчим километрийн зайд орших Казань хотод АСЕАН-ы дээд хэмжээний уулзалтыг зохион байгуулж байжээ. Украины Гадаад хэргийн сайд Андрий Сыбиха Москвагийн оршин суугчдад хандан, Ерөнхийлөгч Путинээс дайныг хэзээ дуусгахыг нь асуухыг уриалжээ. Оросын тал саяхан Москва хотын иргэний барилгуудын дээвэр дээр Панцирь-СМД-Э агаарын хамгаалалтын шинэ системийг байрлуулсан боловч хэд хэдэн дрон байндаа хүрч чадсан байна.
Эх сурвалж:
• unn.ua
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.