Японд хүчтэй газар хөдлөлтийн улмаас өмнөд Кюшүгийн хурдны замын 26 цэгт эвдрэл гарч хаагджээ

Японы өмнөд хэсгийн Кюшү аралд 2026 оны долоодугаар сарын 28-ны мягмар гаргийн үдээс хойш 7.1 магнитудын хүчтэй газар хөдлөлт болсон. 

Улмаар зарим бүс нутагт дэлбэрэлт гарч, барилга байгууламж нурсан тул эрэн хайх, аврах ажиллагааг шуурхай эхлүүлээд байна. Одоогийн байдлаар байгалийн гамшгийн улмаас амиа алдсан хүний тоо 13-т хүрч, олон арван хүн сураггүй болоод байгааг албаныхан мэдээллээ. Кумамото мужид 62 хүн бэртэж, нийт бэртэгсдийн тоо 100 давжээ.

Гамшгийн дараах эрэн хайх ажиллагаа хамгийн их хохирол амссан хоёр том үйлдвэрлэл, худалдааны цэгт үргэлжилж байна. Кашима хотод байрлах "Aeon Mall Kumamoto" худалдааны төвд газар хөдлөлтийн дараа шингэрүүлсэн хий алдагдсаны улмаас хүчтэй дэлбэрэлт болж, барилгын хоёрдугаар давхар хэсэгчлэн нуржээ. Үүний улмаас худалдааны төвийн гурван ажилтан амиа алдсан нь тогтоогдсон байна. Түүнчлэн Яцүширо хот дахь "Nippon Paper Industries" үйлдвэрийн том яндан нурж, хоёр ажилтан нас барсан байдалтай олдсон бөгөөд есөн ажилтан одоог хүртэл сураггүй хэвээр байна.

Байгалийн гамшгийн улмаас 45 мянга орчим өрх цахилгаангүй болж, 9500 гаруй айлын хийн хангамж тасалдаж, ундны усны хомсдол үүсээд байна. Тээврийн дэд бүтцийн хувьд Кумамото болон Кагошима чиглэлийн хурдан галт тэрэгний хөдөлгөөнийг бүрэн зогсоож, Өмнөд Кюшүгийн хурдны замын 26 цэгт эвдрэл гарч хаагджээ. Мөн Кумамото нисэх буудлын барилгын аюулгүй байдлыг шалгах зорилгоор олон арван нислэгийг цуцалсан байна.

Одоогийн байдлаар таван мужийн хэмжээнд байгуулагдсан 500 гаруй түр хоргодох байранд 9000 гаруй иргэнийг нүүлгэн шилжүүлээд байгаа бөгөөд бүс нутагт хэт халалт үргэлжилж байгаа тул хоргодох байруудыг агааржуулагчаар хангах ажил хийгдэж байна.

Ойрын өдрүүдэд газар хөдлөлтийн дараах чичиргээ үргэлжлэх магадлалтай байгаа тул сонор сэрэмжтэй байхыг Засгийн газраас иргэдэд анхааруулж, гамшигт нэрвэгдсэн дэд бүтцийг сэргээн засварлах, сураггүй болсон иргэдийг эрэн хайх ажиллагааг эрчимтэй үргэлжлүүлж байна.

Эх сурвалж:

• english.news.cn

• japan.kantei.go.jp

• japantimes.co.jp

•

• aninews.in