Дональд Трамп Украинд Патриот пуужин үйлдвэрлэх зөвшөөрөл олгохоос татгалзлаа
АНУ-ын Ерөнхийлөгч Дональд Трамп Украинд "Патриот" (Patriot) агаарын довтолгооноос хамгаалах системийн пуужингуудыг эх орондоо үйлдвэрлэх тусгай зөвшөөрөл олгох амлалтаасаа ухарлаа.
Долоодугаар сарын сүүлээр болсон хэд хэдэн уулзалт, ярилцлагын дараа Цагаан ордны тэргүүн өмнөх байр сууриасаа ухарч, пуужингийн технологио бусдад шилжүүлэхэд бэлэн биш байгаагаа албан ёсоор мэдэгдэв.
2026 оны долоодугаар сарын 8-нд Турк улсад болсон НАТО-гийн дээд хэмжээний уулзалтын үеэр Ерөнхийлөгч Д.Трамп Украинд Патриот пуужинг дотооддоо угсрах зөвшөөрөл олгохоо анх зарлаж байсан юм. Үүний дараа долоодугаар сарын 28-нд Украины Ерөнхийлөгч Владимир Зеленский Цагаан ордонд Д.Трамптай уулзаж, яриа хэлэлцээ амжилттай болсон бөгөөд АНУ-ын тал үйлдвэрлэлийн зөвшөөрөл олгохыг зөвшөөрсөн хэмээн мэдээлж байв.
Ерөнхийлөгч Д.Трамп цэргийн өндөр технологио хуваалцахаас татгалзаж буй шалтгаанаа тайлбарлахдаа, Патриот систем бол маш онцгой зэвсэг бөгөөд түүний технологийг бусдад өгөх нь амаргүй шийдвэр гэдгийг онцолжээ. Мөн "Бид хэнд зөвшөөрөл олгож байгаадаа маш болгоомжтой хандах ёстой. Бид ер нь зэвсэгт техникийн үйлдвэрлэлийн зөвшөөрлийг тэр бүр олгоод байдаггүй" хэмээн хэлсэн байна.
Тэрбээр зэвсэг нийлүүлэхээс илүүтэй Орос, Украины мөргөлдөөнийг дипломат аргаар зогсоохыг урьтал болгож байгаагаа илэрхийлж, "Бид пуужин хайгаагүй, харин энх тайвныг эрэлхийлж байна" гэж нэмж дурджээ.
Эх сурвалж:
•
• wbal.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.