Гэр бүлээ тэжээхээр Монгол Улсыг зорьсон Нигерийн иргэн хулхидуулж, хүнд байдалд оржээ
Өмнөд Солонгос улстай ижил төстэй цалин олно гэж тооцон, ар гэрээ санхүүгийн хувьд дэмжих зорилгоор Нигер Улсын иргэн Чинеду Ноди наймдугаар сарын 21-ний өдөр Монгол Улсад зургаан сарын хугацаатай аяллын визээр иржээ.
Видео ярилцлагыг энд дарж үзнэ үү.
Тэрбээр Монгол Улсад ирэх болсон шалтгаан нь нэгэн монгол иргэнтэй холбогдож, "Манай улсад африк зочид буудал бий, энд ирж ажиллах боломжтой" гэсэн амлалтад итгэсэнтэй холбоотой аж. Гэвч түүнийг Улаанбаатар хотод газардахад зуучилсан хүн нь утсаа салгаж, холбоо барих боломжгүй болсноор хулхидуулсан болохоо мэджээ.
Ийнхүү гадны оронд орох оронгүй, төөрч будилж явахдаа ногоо тариалдаг А.Тамирын гэр бүлтэй таарсан байна. Учир байдлыг сонссон хосууд өрөвдөж, өөрийн гэртээ байрлуулан тус дэм болжээ. Улмаар түүнийг Эрдэнэт хот руу явуулж, барилгын ажил олж өгсөн ч саяхан ар гэрт нь гашуун мэдээ ирж, аав нь өөд болсныг сонссон Чинеду Ноди Улаанбаатар хот руу яаралтай буцаж иржээ.
Тэрбээр Эрдэнэт хотод 21 хоног ажиллаж олсон цалингаасаа аавынхаа оршуулгын зардал руу шилжүүлсэн тул өдгөө эх орон руугаа буцах болон амьжиргаагаа залгуулах санхүүгийн ямар ч боломжгүй, хүнд байдалд ороод байна.
Ар гэрийнхээ амьдралыг өөд татахаар зориг шулуудан гадаад улсыг зорьсон ч хууль бус зуучлагчийн мэхэнд орж, хохирол амссан Чинеду Ноди одоогоор А.Тамирын гэр бүл дээр түр хоргодож байгаа аж.
Сурталчилгаа
Сэтгэгдэл (19)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.