Ормузын хоолой дахь халдлагын улмаас газрын тосны үнэ огцом өслөө
Ормузын хоолой болон түүний ойролцоох худалдааны танкерууд руу чиглэсэн цуврал халдлага гарч, Мексикийн буланд цаг агаарын саатал нүүрлэсний улмаас олон улсын зах зээлд газрын тосны үнэ өчигдрөөс огцом өслөө.
Сүүлийн арилжаагаар Брент маркийн газрын тосны үнэ 4-5 орчим хувиар өсөж, баррель нь 105.20-105.30 ам.долларт хүрсэн бол Техасын WTI маркийн тос мөн адил өсөлт үзүүлж 92.28-аас 92.75 ам.долларт хүрсэн байна.
Далайн тээврийн хяналтын "Kpler" байгууллагын тайланд дурдсанаар, есдүгээр сарын 28-наас аравдугаар сарын 4-ний хооронд Ормузын хоолойд нийт арван танкер цохилтод өртжээ. Түүнчлэн аравдугаар сарын 5-наар дууссан долоо хоногт газрын тос болон шингэрүүлсэн байгалийн хий тээвэрлэгч 12 хөлөг халдлагад өртсөн нь байдлыг улам хурцатгав. Үүний үр дүнд аравдугаар сарын 6-ны мягмар гаргийн байдлаар хоолойгоор ердөө долоон танкер дамжин өнгөрсөн нь ердийн дунджаас хоёр дахин буурсан үзүүлэлт болсон бөгөөд дизель, бензиний бэлэн бүтээгдэхүүний урсгал даваа гарагт бүрэн зогсжээ.
Далайн бүсэд гарсан тодорхой ослуудаас дурдвал, аравдугаар сарын 7-ны лхагва гаргийн өдөр Катарын хойд хэсэгт явж байсан Антигуа ба Барбуда улсын далбаатай "Acers" хөлөг онгоц олон тооны суманд өртөж, багийн гишүүд гэмтсэн байна. Үүнээс өмнө Панамын далбаатай танкер цохилтод өртөх үеэр 12 ажилтан бэртсэн тохиолдол гарчээ. Ийм нөхцөлд Тегераны эрх баригчид хяналт шалгалтыг тойрон гарах гэсэн хууль бус тээврийн замуудыг хааж, саатуулахаа мэдэгдсэн байна.
Нийлүүлэлтийн хямралыг байгалийн хүчин зүйл улам даамжруулж байгаа бөгөөд Мексикийн буланг чиглэсэн "Исайас" хар салхины улмаас АНУ-ын эрэг орчмын газрын тос олборлолтын 25 хувь буюу өдөрт 500,000 гаруй баррель олборлолт түр зогсжээ. "Shell" болон "Chevron" зэрэг томоохон компаниуд ажилтнуудаа нүүлгэн шилжүүлж, үйл ажиллагаагаа хязгаарласан байна. Мөн АНУ-ын Эрчим хүчний мэдээллийн захиргааны тоо баримтаар арилжааны түүхий тосны нөөц 3.2 сая баррелиар хорогдсон нь зах зээлийн хомстолыг гүнзгийрүүлэв.
Олон улсын эрчим хүчний агентлаг стратегийн нөөцөөс нийлүүлэлт хийх ажлыг эрчимжүүлж байгаа ч энэ нь тээвэрлэлтийн тасалдлыг нөхөхөд хүрэлцэхгүй гэж шинжээчид үзэж байна. Эрчим хүчний үнийн хөөрөгдөл нь инфляцын түгшүүрийг дахин нэмэгдүүлж, хөрөнгийн зах зээлд уналт дагуулан бондын өгөөжийг өсгөсөн бөгөөд Их Британийн арван жилийн хугацаатай төрийн бондын өгөөж 5.515 хувьд хүрсэн нь 2007 оноос хойших дээд амжилт боллоо.
Эх сурвалж:
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.