Бяцхан охин аавыгаа цагдаад өгснөөр бие засах 500 газар барихаар болжээ

Энэтхэгт долоон настай бяцхан охин Ханифа Заара аавыгаа амлалтаа зөрчсөн гэж цагдаад өгчээ. Охины аав бие засах газар барьж өгнө гэсэн амлалтдаа хүрээгүй байна.

Цагдаад өгсөн захидалдаа охин “аав маань амлалтандаа хүрэлгүй надад худлаа хэлсэн учраас баривчлагдах ёстой. Би гадаа бие засахаас үнэхээр их ичиж байна” гэжээ.

НҮБ-ын Хүүхдийн сангийн судалгаагаар Энэтхэг улсад 500 сая хүн ил задгай бие засдаг байна. Ариун цэврийн өрөө, бие засах газрууд барьдаг ч ихэвчлэн ашиглагддаггүй.

Ханифа охин Тамил Наду мужийн Амбур тосгонд эцэг эхтэйгээ амьдардаг. Түүний хөршүүд бие засах газар барьсныг хараад Ханифа ч бас ийм газартай болохыг хүсчээ.

“Намайг гадаа бие засч байхад хүмүүс хараад байдаг нь үнэхээр ичмээр муухай байдаг. Хэрэв намайг онц сурвал аав маань надад бие засах газар барьж өгнө гэсэн. Би одоо хоёрдугаар анги. Ангидаа хамгийн онц сурдаг нь. Гэвч аав маань одоо хүртэл худлаа ярьсаар л байна. Тиймээс энэ бол түүнийг баривчлах шалтгаан мөн” гэж цагдаагийн газарт илгээсэн захидалдаа бичжээ.

“Хэрэв та нар аавыг маань баривчлахгүй бол ядаж түүнийг амлалтаа биелүүлэхийг нь шаардаж гарын үсгээр баталгаажуулах хэрэгтэй” гэсэн байна.

Охин онц сурснаа гэрчлэх шагнал, батламжуудаа захидалдаа хавсарган сургуулийнхаа хамгийн ойр байдаг цагдаагийн газарт аваачжээ. Цагдаа нар охины өргөдөл захидлыг хүлээж авч асуудлыг нь шийдэхийг хичээх болно хэмээн мэдэгдсэн байна.

Ханифагийн захидлын дагуу Амбур тосгоны эрх баригчид 500 бие засах газар барихаар төлөвлөж, төсөв хандив цуглуулахаар болжээ. Аав нь охиндоо бие засах газар барьж өгөх хүсэлтэй байсан ч мөнгөгүй учраас чадаагүй. Ханифа охин тосгоны удирдлага, цагдаагийн газар захидлыг нь хүлээж авч бие засах газар барихаар болсонд маш их баярлаж 10 хоног огт дуугараагүй аавтайгаа гар барин эвлэрчээ.

Энэтхэг улсын Засгийн газар 2019 он гэхэд айл өрх бүрийг бие засах газартай болгох зорилт тавьсан. Гэвч хөдөө орон нутгийн иргэдийн 89 хувь нь ил задгай бие зассаар байна.

Эх сурвалж: www.bbc.com