25 өрхөд 1.7 тэрбум төгрөгийн нөхөн олговор олгоно
Нийслэлийн ИТХ-ын Тэргүүлэгчид өчигдөр хуралдаж, нийслэл хотод өрнүүлсэн бүтээн байгуулалтад газраа чөлөөлсөн иргэдийн асуудлыг хэрхэн шийдвэрлэх талаар хэлэлцлээ. Улсын төсвийн хөрөнгө оруулалтаар энэ онд эхэлсэн зарим бүтээн байгуулалтын нөлөөллөөр газраа чөлөөлсөн 25 өрхөд нөхөн олговор өгөх шаардлага үүсэж буй талаар нийслэлийн Засаг даргын үүргийг түр орлон гүйцэтгэгч Ж.Батбаясгалан танилцууллаа. Тэрбээр “Нийслэлийн зарим бүтээн байгуулалтыг 2018 оны газар зохион байгуулалтын төлөвлөгөөнд тусгаагүй байсан. Засгийн газраас газар чөлөөлсөн иргэдэд нөхөн олговор өгөхөөр болсон ч өнөөдрийг хүртэл шийдээгүй байна. Үүний улмаас 25 өрх орох оронгүй болсон.
Нийслэлийн Газрын албанаас эдгээр өрхтэй гэрээ байгуулж, иргэд газраа чөлөөлж, хэдийнэ бүтээн байгуулалтын ажил хийгээд байна” гэв. Дээрх 25 өрхөд 1.7 тэрбум төгрөгийн нөхөн олговор өгөх тооцоотой. Концессын гэрээгээр нийслэлд өрнүүлсэн бүтээн байгуулалтаас 1.2 тэрбум төгрөгийн хэмнэлт гарч буй бөгөөд тус хөрөнгийг иргэдийн нөхөн олговорт шилжүүлэх саналыг нийслэлийн Засаг даргын үүргийг түр орлон гүйцэтгэгч Ж.Батбаясгалан гаргасан юм. Тэргүүлэгчид уг асуудлыг хэлэлцээд НИТХ-ын ээлжит XXI хуралдаанаар хэлэлцүүлэхээр тогтлоо.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.